Kur flitet për sukseset e Argjentinës, emri i parë që vjen në mendje është ai i Lionel Messit. Talenti i jashtëzakonshëm i yllit argjentinas është i njohur në të gjithë botën, por pas triumfeve të fundit të kombëtares qëndron një tjetër Lionel: Lionel Scaloni.
Trajneri argjentinas është njeriu që arriti të krijojë ekuilibrin perfekt mes një superylli si Messi dhe një skuadre të bashkuar. Përpara se t’i jepte kapitenit të tij lirinë për të shkëlqyer, Scaloni ndërtoi një grup të fortë, ku çdo lojtar kishte rolin e tij.
Për shumë vite, marrëdhënia e Messit me kombëtaren argjentinase nuk ishte e lehtë. Në Botërorin e vitit 2010, nën drejtimin e Diego Maradonës, Argjentina u eliminua në mënyrë të dhimbshme nga Gjermania. Edhe pse Maradona mbetet një figurë e dashur për tifozët, aventura e tij si trajner tregoi se ekipi kishte nevojë për një drejtim tjetër.
Në vitin 2014, Argjentina e Alejandro Sabellas arriti finalen e Botërorit, por Messi nuk arriti të shfaqej në nivelin e tij më të mirë.
Katër vite më vonë, në Rusi 2018, skuadra nën drejtimin e Jorge Sampaolit dështoi, ndërsa Messi u ngarkua me një përgjegjësi të madhe, deri në vendimmarrjen për ndryshimet gjatë ndeshjeve.
Pas atij zhgënjimi, Messi mendoi edhe largimin nga kombëtarja. Në atë moment hyri në skenë Scaloni, fillimisht si trajner i përkohshëm. Shumë e kritikuan zgjedhjen, madje Maradona deklaroi se ai mund të “drejtonte vetëm trafikun”.
Por Scaloni bëri të kundërtën. Ai mblodhi ekipin dhe ndryshoi mentalitetin: Argjentina nuk duhej të luante vetëm për Messin, por të bëhej një skuadër e aftë të fitonte edhe pa u varur nga një individ.
Me kalimin e kohës, filozofia e tij dha rezultate. Në vitin 2021, Argjentina fitoi Kupën e Amerikës pas 28 vitesh pritje, duke mposhtur Brazilin në finalen e zhvilluar në Maracanã. Messi fitoi trofeun e parë madhor me kombëtaren dhe Scaloni nisi një seri historike rezultatesh.
Në Botërorin e Katarit, pas humbjes surprizë ndaj Arabisë Saudite në ndeshjen hapëse, trajneri argjentinas tregoi guxim duke ndryshuar formacionin. Ai afroi lojtarë të rinj si Julián Álvarez dhe Enzo Fernández dhe ndërtoi një ekip që më pas arriti deri te titulli botëror.
Scaloni ka krijuar një lidhje të veçantë me Messin. Ai e vlerëson jo vetëm për talentin, por edhe për karakterin dhe sakrificën si kapiten. Për lojtarët argjentinas, besimi te trajneri është kthyer në një forcë të madhe, aq sa ekipi është pagëzuar “Scaloneta”.
Sot, historia e Argjentinës nuk shkruhet vetëm nga këmbët e Messit, por edhe nga mendja e Scalonit. Njëri ka magjinë në fushë, tjetri ka krijuar skenën ku ajo magji mund të shfaqet.
