Kryetari i LVV-së, Albin Kurti ka folur për “ndërmarrje të madhe e të gjerë” me LDK-në dhe takime të tjera në vazhdim pas takimit me kryetarin e kësaj partie, Lumir Abdixhiku dhe ish-presidenten Vjosa Osmani. PDK-ja e vendosi veten në opozitë pas takimit të kryetarit Bedri Hamza me kryeministri në detyrë, ndërsa Aleanca refuzon të takohet dhe ofron mbështetjen për një qeveri pa të, nëse Kurti ua plotëson gjashtë kërkesa.
Seanca konstituive e Kuvendit duhet të mbahet më së largu në fund të javës së parë të gushtit, ndërkohë që të premten janë zhvilluar bisedimet e pare ndërmjet tri partive më të mëdha parlamentare për formimin e institucionve.
Në LDK nuk i janë përgjigjur interesimit të Gazetës Express nëse do të ketë takime të tjera apo se kur mund të zhvillohen ato. Megjithatë kjo u paralajmërua pas takimit të parë me LVV-në. Në PDK nuk ishin të qasshëm t’i përgjigjen interesimit të Expressit për këtë çështje.
Lideri i Lëvizjes Vetëvendosje, kryeministri në detyrë, Albin Kurti, priti në një takim në Kuvend, kryetarin e Partisë Demokratike të Kosovës, Bedri Hamzën, i cili më pas tha se PDK-ja ka vendosur të qëndrojë në opozitë.
“Bazuar në bisedat që kemi pasur dhe diskutimet që kemi pasur, normalisht korrekte, qëndrimi ynë është që PDK për këtë mandat është parti në opozitë dhe ne i dëshirojmë sukses zotit Kurti dhe të gjithë atyre që takohen, bisedojnë, që t’i japin vendit institucione, duke i përfshirë të gjitha institucionet”, tha Hamza për gazetarët pas takimit paraditen e të premtes.
Hamza tha se përgjegjësinë për formimin e institucioneve e ka LVV-ja si partia që doli e para në zgjedhjet parlamentare të 7 qershorit.
Pas tij, foli Kurti. Pasi tha se nuk pati “ndonjë rezultat konkret” në takimin me Hamzën, shtoi se megjithatë kishte “vullnet” dhe “atmosferë konstruktive”.
Kurti tha se për President, pikënisje do të ishte “një figurë konsensuale, dikush i asnjë partie, përtej polemikave të skenës aktuale, që i ka vlerat e dëshmuara kombëtare e profesionale dhe të jetë shprehje e unitetit”.
Ai tha se për qeverinë përgjegjësia bie mbi LVV-në, por shtoi se për zgjedhjen e Presidentit “të gjithë kemi përgjegjësi”.
Para takimit pasdite me kryetarin e Lidhjes Demokratike të Kosovës, Lumir Abdixhiku dhe ish-presidenten Vjosa Osmani, Kurti u shpreh optimist.
Kurti foli për “atmosferë konstruktive” edhe pas takimit me Abdixhikun dhe Osmanin.
Tha se kishin folur edhe për “orarin që na pret përpara konstituimit të institucioneve”. Theksoi se ishte “takimi i parë” dhe shtoi se do të ketë edhe takime të tjera, ndërsa përmendi se “kemi edhe katër javë përpara për fillimin e seancës konstituive”.
Kurti tha se në këtë takim u trajtuan të gjitha temat, megjithëse shtoi se nuk kishte ende një marrëveshje konkrete. Ai tha se është optimist “për rrugën përpara”.
“Diskutojmë koncepte, parime, gjithashtu orare e funksione. Është një ndërmarrje e madhe e gjerë që kërkon besim e mirëbesim, e cila kërkon kohë për realizim. Do të jemi transparentë karshi jush sa i përket procesit në të cilin ndodhemi, e kemi edhe konfidencialitetin e këtyre bisedave, të cilat duhet të rezultojnë me të arritura konkrete që të kemi çka të bëjmë publike”, deklaroi ai.
Me Abdixhikun e Osmanin, Kurti tha se folën më shumë se “çka të bëjmë strategjikisht që ta arrijmë numrin maksimal të deputetëve kur të vijë çështja e zgjedhjes së Presidentit”.
Shmangia e zgjedhjeve të reja është e domosdoshme, tha kryetari i LDK-së pas takimit, të cilin e vlerësoi si “hap i mirë, i mbarë për të hapur kapitujt tjerë takues e diskutues”.
“Për marrëveshje të mirë jemi të unifikuar”, tha ai, dhe shtoi se flet në emër të të gjithë 15 deputetëve të zgjedhur të LDK-së.
Në këtë fazë, Abdixhiku tha se ishin dakorduar për ta vazhduar komunikimin.
Përveç Abdixhikut e Hamzës, Kurti i kishte dërguar ftesë për takim edhe kryetarit të Aleancës, Ardian Gjinit.
Gjini ka paraqitur gjashtë kërkesa që do të duhej t’i plotësonte Kurti në këmbim të mbështetjes të krijimit të institucioneve, pa pjesëmarrjen e kësaj partie në qeverisje.
Lëvizja Vetëvendosje ka thënë javë më parë se i ka siguruar votat për formimin e Qeverisë së re dhe se më pas do të kërkojë konsensus me partitë e tjera për zgjedhjen e Presidentit.
Mozgjedhja e Presidentit ishte shkaku që vendi mbajti në fillim të qershorit zgjedhjet e treta në rreth një vit e gjysmë./Gazeta Express
