Policia e Kosovës ka njoftuar se tre persona janë dërguar në mbajtje për 48 orë, nën dyshimin se kanë tentuar ta tjetërsojnë dhe shesin një parcelë në Sllatinë të Fushë Kosovës, në vlerë prej 1 milion e 550 mijë eurosh, duke përdorur dokumente të falsifikuara.
Sipas njoftimit të Policisë së Kosovës, njësitet e Drejtorisë për Hetimin e Krimeve Ekonomike dhe Korrupsionit (DHKEK) në Prishtinë, përmes veprimeve hetimore kanë siguruar prova ndaj të dyshuarve M.T., L.Sh. dhe M.R.
Policia dyshon se të arrestuarit, përmes falsifikimit të dokumenteve të Serbisë, përdorimit të dokumenteve të rreme si të vërteta dhe prezantimit të një personi të rremë si person real, kanë tentuar që përmes noterit ta tjetërsojnë dhe shesin një parcelë me sipërfaqe rreth dy hektarë në Sllatinë të Fushë Kosovës.
“Të dyshuarit, njëkohësisht dyshohet që përmes mashtrimit (dokumenteve të falsifikuara), kanë tentuar që të njëjtën parcelë t’ua shesin disa blerësve, në vlerë totale prej 1,550,000.00 euro”, thuhet në njoftimin e Policisë së Kosovës.
Sipas Policisë, të dyshuarit kanë falsifikuar pasaportën dhe letërnjoftimin e Serbisë në emër të pronarit të vërtetë të parcelës, me qëllim që përmes mashtrimit të shisnin pronën dhe të përfitonin shumën prej 1 milion e 550 mijë eurosh nga blerësit.
Për rastin është konsultuar prokurori kujdestar nga Prokuroria Themelore në Prishtinë, ndërsa të dyshuarit janë intervistuar më 17 korrik në prezencë të avokatëve.
Ata janë dërguar në mbajtje prej 48 orësh, nën dyshimin për kryerjen e veprave penale “Mashtrimi”, “Falsifikimi i dokumenteve” dhe “Legalizimi i përmbajtjes së rreme”, sipas Kodit Penal të Republikës së Kosovës.
