Barcelona e ka kompletuar përforcimin e dytë të afatit kalimtar të verës.
Klubi katalanas e ka zyrtarizuar transferimin e Karim Adeyemit nga Borussia Dortmundi, duke ia dhënë trajnerit Hansi Flick një tjetër alternativë të rëndësishme në repartin ofanziv.
Sulmuesi gjerman ka nënshkruar kontratë pesëvjeçare me Barcelonën dhe do të jetë pjesë e projektit të ri të skuadrës “Blaugrana” për sezonin 2026/27, shkruan “Gazeta Express”.
Adeyemi bëhet afrimi i dytë i verës për Barcelonën, pas transferimit të anglezit Anthony Gordon.
Për kartonin e 24-vjeçarit, Barcelona do t’ia paguajë Borussia Dortmundit 22 milionë euro si shumë fikse, ndërsa marrëveshja përfshin edhe 7 milionë euro bonuse, të lidhura me paraqitjet dhe objektivat sportivë.
Adeyemi largohet nga Dortmundi pas katër vitesh në Gjermani, ku u shndërrua në një nga lojtarët më të rëndësishëm të skuadrës.
Ai kishte ende kontratë deri në vitin 2027, por dëshira e tij ishte ta provonte një aventurë të re dhe Barcelona ishte zgjedhja e preferuar.
Flick e njeh mirë lojtarin nga Kombëtarja e Gjermanisë dhe beson se shpejtësia, shpërthimi dhe aftësia e tij për të luajtur në disa pozicione të sulmit do t’i japin më shumë variante Barcelonës.
Adeyemi pritet të jetë një alternativë e rëndësishme për krahët e sulmit, duke konkurruar për minuta me yje si Lamine Yamal, ndërsa Barcelona shpreson që në Camp Nou ai ta rikthejë versionin e tij më të mirë pas disa problemeve me dëmtimet gjatë viteve të fundit.
Me këtë transferim, Barcelona vazhdon ta ndërtojë skuadrën e re nën drejtimin e Hansi Flick, duke i kombinuar talentet e rinj me lojtarë me eksperiencë për sezonin e ardhshëm.
