Një nga momentet më të diskutueshme të çerekfinales së Kupës së Botës mes Zvicrës dhe Argjentinës ka marrë një zhvillim të ri.
Bordi Ndërkombëtar i Shoqatave të Futbollit (IFAB) ka konfirmuar se Breel Embolo nuk duhej të ndëshkohej me karton të verdhë për simulim, vendim që më pas çoi në përjashtimin e tij me karton të verdhë të dytë, shkruan Indeksonline
Incidenti ndodhi pas më shumë se 70 minutash lojë, kur arbitri Joao Pinheiro fillimisht nuk e identifikoi saktë situatën dhe ndëshkoi me karton të verdhë Leandro Paredes të Argjentinës. Më pas, pas ndërhyrjes së VAR-it, vendimi u ndryshua dhe Embolo mori kartonin e dytë të verdhë.
Sipas interpretimit të IFAB-it, VAR nuk kishte të drejtë të ndërhynte në këtë rast, pasi situata nuk plotësonte kriteret e “identitetit të gabuar”. Dy episodet ishin të ndara dhe vendimi fillestar për Paredes-in nuk mund të rishikohej për të dhënë një ndëshkim të ri ndaj Embolos.
IFAB-ja ka bërë të ditur se ndëshkimi retrospektiv i simulimeve është një çështje që po shqyrtohet, por deri në një ndryshim eventual të protokollit, ndërhyrja e VAR-it në rastin e Embolos konsiderohet e gabuar.
Vetë Embolo, dhjetë ditë pas eliminimit, foli për herë të parë publikisht, por nuk u ndal te momenti i diskutueshëm, duke thënë vetëm: “Do të kthehemi më të fortë”./Indeksonline/
