Mbrojtësi francez Benjamin Mendy ka vendosur ta nxjerrë në ankand medaljen e fituar me Francën në Kupën e Botës 2018, e cila është shitur për 54 mijë euro, raportojnë mediat franceze.
Futbollisti 32-vjeçar, i cili aktualisht luan te Pogon Szczecin në Poloni, e ofroi medaljen në shitje gjatë ankandit Global Football Auction Part 2, të organizuar nga kompania amerikane Goldin.
Sipas përshkrimit të ankandit, medalja kishte disa dëmtime dhe shenja përdorimi.
Përveç medaljes, blerësi ka marrë edhe certifikatën zyrtare të fituesit të Kupës së Botës, të nënshkruar nga ish-mbrojtësi i Monacos dhe Manchester Cityt.
Edhe pse nuk ishte në formën e tij më të mirë, Mendy u përfshi nga Didier Deschamps në skuadrën e Francës për Kupën e Botës 2018.
Ai pati një rol dytësor gjatë turneut, pasi Lucas Hernandez ishte titullar në të gjitha ndeshjet e Francës, me përjashtim të një takimi.
Ndeshja e fundit e Benjamin Mendy me fanellën e Francës ishte në vitin 2019, në një përballje kualifikuese për Kampionatin Evropian ndaj Shqipërisë.
Në vitin 2023, Mendy u shpall i pafajshëm nga drejtësia britanike për dhjetë akuza që përfshinin përdhunim dhe tentativë përdhunimi.
