Gjatë hulumtimit për institucionet shëndetësore private kemi hasur në një rast të veçantë. Kjo pasi që nuk publik nuk paraqitet as si klinikë, as qendër estetike apo me ndonjë përkufizim tjetër. Ka edhe uebfaqe, por aty nuk e ka kategorinë që e shpjegon aktivitetin, por vetëm tregohen shërbimet të cilat i kryen. Në tentativë për ta lënë në mjegull profilizimin e aktivitetit, ka bërë një ‘gabim’, i cili e kthjell mjegullën e hedhur në rrjete sociale, pasi që në ARBK si aktivitet kryesor ka deklaruar aktivitetet e mjekësisë së specializuar. Fjala është “RINU” Sh.P.K. të Shkurte Musa.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “RINU” Sh.P.K. me Shkurte Musa është gjobitur me 3 mijë euro për shkelje të Ligjit për Shëndetësi.
Madje, me vendimin e datës 22 janar 2026, Inspektorati Shëndetësor i kishte ndaluar ofrimin e shërbimeve jo shëndetësore dhe shëndetësore brenda këtij institucioni deri në lejim nga Divizioni për Licencim dhe Akreditim i Ministrisë së Shëndetësisë.
Por kjo ndalesë nuk i kishte bërë përshtypje qendrës estetike “RINU” të Shkurte Musës, pasi që menjëherë kishte vazhduar veprimtarinë e saj, sikur vendimi i inspektorëve të ishte një letër e pavlerë.
Në arsyetimin e vendimit të Inspektoratit Shëndetësor që e ka siguruar Veriu.info, thuhet se gjatë inspektimit është hasur në një masazhere filipinase, e cila nuk është e lajmëruar si staf në DLA – MSh-së.
Inspektorët kanë konstatuar se “RINU” Sh.P.K. ka ofruar shërbime për Fizioterapi, masazh relaksues, kuping terapi – hixhama, drenazh Limfatike, tretmanë për celulit, shërbime këto të cilat nuk i kishte të lajmëruara në DLA – MSh-së. Po ashtu, për këto shërbime është konstatuar se nuk kishte staf adekuat
Në “RINU” është konstatuar se në mënyrë të kundërligjshme ofroheshin shërbime për: depilimin të qimeve me laser, tretmane të fytyrës me B.T.L., tretmane të trupit me pajisje Lutronic, ku edhe këto shërbime nuk ishin të lajmëruara në DLA – MSh-së dhe për të cilin nuk kishte staf adekuat.
“Nga sa u tha më lart se Inspektorati Shëndetësor në kohën e inspektimit ka konstatuar që ofrohen shërbime jo shëndetësore brenda hapësirave të këtij institucioni dhe shërbime shëndetësore të palejuara nga DLA – MSh-së, si dhe pa staf adekuat dhe staf të palajmëruar në DLA – MSh-së”, thuhet në vendimin e Inspektoratit Shëndetësor për “RINU” të siguruar nga Veriu.info.
Për shkak të këtyre shkeljeve të shumta, Inspektorati Shëndetësor i kishte ndaluar ofrimin e shërbimeve jo shëndetësore brenda këtij institucioni dhe shërbimeve shëndetësore deri në lejimin nga DLA – MSh, si dhe deri në plotësim të stafit dhe lejim nga DLA – MSh.
Mirëpo, siç shihet nga publikimet në rrjete sociale, “RINU” kishte vazhduar aktivitetin e vet edhe pas ndalesës, duke mos i bërë përshtypje ky vendim i Inspektoratit Shëndetësor.
Burime të Veriu.info bëjnë të ditur se arsyeja që ka vazhduar aktivitetin “RINU” edhe përkundër ndalimit nga Inspektorati Shëndetësor, është mbështetja nga një familjar i saj, që është njëri prej biznesmenëve më me ndikim në Kosovë.
Veriu.info ka tentuar të marrë një qëndrim nga “RINU” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
Ndryshe, Shkrute Musa në një video të publikuar me rastin e vizitës në “RINU” të Londrimit të BBVK, i kishte thënë se “RINU” është klinikë.
LEXONI EDHE:
