E ardhmja e Karim Benzemas te Al-Hilal është rikthyer në diskutim.
Sipas asaj që raporton gazeta spanjolle “AS”, sulmuesi francez mund të shkëputet nga kontrata me klubin saudit qysh në këtë afat kalimtar.
Në bazë të ndarjes së mundshme qëndron zgjedhja e Simone Inzaghit, i cili nuk do ta konsideronte ish-sulmuesin e Real Madridit si një lojtar qendror në projektin e tij.
Për këtë arsye, Benzema mund ta shqyrtojë prishjen e kontratës dhe në këtë rast ai mund të bëhet lojtar i lirë.
Situata, megjithatë, nuk është e thjeshtë. Një pjesë e rëndësishme e pagës së tij mbulohet nga Saudi Pro League, element që do ta bënte të komplikuar një largim të menjëhershëm pa një marrëveshje mes të gjitha palëve të përfshira: lojtarit, klubit dhe ligës.
Gjithmonë sipas “AS”, Benzema ka kërkuar ta marrë të gjithë pagën e parashikuar për vitin e fundit të kontratës përpara se ta pranojë largimin.
Një kërkesë që nuk është pritur pozitivisht nga drejtuesit e Al-Hilalit dhe vetë drejtuesit e ligës saudite.
Ndërkohë, klubi po e vlerëson tashmë një zëvendësues të mundshëm.
Emri në krye të listës është ai i Ollie Watkins, sulmuesit anglez të Aston Villës, i cili ka kontratë deri në vitin 2028.
Kështu, aventura e Benzemas në Arabinë Saudite mund të përfundojë më herët nga sa ishte parashikuar, ndërsa Simone Inzaghi po mendon për një tjetër profil për repartin ofanziv të Al-Hilalit. /Gazeta Express
