Një incizim me dron dyshohet se është bërë shkak për një përleshje mes dy familjeve në fshatin Bistricë të Leposaviqit, ku në incident është përfshirë edhe një zyrtare policore që ndodhej jashtë detyrës.
Rasti ka ndodhur të dielën, më 16 gusht, rreth orës 13:25, te restoranti “Lumi”, ndërsa sipas informacioneve fillestare në përleshje janë përfshirë pesë persona.
Burimet e Sinjalit bëjnë të ditur se si të dyshuar janë evidentuar Arianit Aliu rreth 24-vjeçar, Sedat Aliu rreth 48-vjeçar, Shemsedin Brahimi rreth 36-vjeçar, Ilirijana Brahimi rreth 30 vjeçare si dhe një zyrtare policore, L.S. 52-vjeçare.
Sipas informacioneve që ka mësuar Sinjali, përplasja dyshohet se nisi për shkak të një incizimi me dron, ndërsa situata më pas eskaloi në konflikt fizik mes personave të pranishëm.
Në deklarimet e dhëna para hetuesve janë paraqitur versione të ndryshme për mënyrën se si ka ndodhur rrahja.
Zyrtarja policore, e cila në momentin e incidentit ishte jashtë detyrës zyrtare, ka mohuar se ka sulmuar ndonjë person. Ajo ka deklaruar se vajza dhe dhëndri i saj ishin sulmuar nga djali i pronarit të restorantit.
Në anën tjetër, djali i pronarit, i intervistuar si i dyshuar, ka pranuar se gjatë përleshjes ka përdorur një lopatë dhe gurë, por ka deklaruar se nuk e di nëse me to ka goditur ndonjë person.
Ai njëkohësisht ka pretenduar se edhe zyrtarja policore e kishte sulmuar me lopatë, pretendim të cilin ajo e ka mohuar.
Për shkak të përfshirjes së polices në rast, është njoftuar edhe Inspektorati Policor i Kosovës (IPK), në praninë e të cilit është marrë deklarata e saj.
Sipas të dhënave fillestare, tri palë kanë pësuar lëndime, ndërsa janë intervistuar edhe dy mysafirë si dëshmitarë. Megjithatë, deklarimet e tyre nuk kanë mundësuar që deri më tani të përcaktohet saktësisht dhe në mënyrë të paanshme dinamika e përleshjes.
Hetuesit kanë identifikuar deri në këtë fazë dy persona nga njëra familje dhe tre nga familja tjetër si të përfshirë, ndërsa hetimet do të vazhdojnë për sigurimin e provave apo dëshmitarëve të tjerë që mund të sqarojnë se çfarë ka ndodhur.
Pas konsultimit me Prokurorin e Shtetit, është urdhëruar që të gjithë personat e përfshirë të intervistohen në cilësinë e të dyshuarve dhe rasti të iniciohet si “Lëndim i lehtë trupor”.
Pas intervistimit, të gjithë janë liruar në procedurë të rregullt
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
