Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një klinikë të transplantimit të flokëve në Gjilan.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Star Hair Clinic” Sh.P.K. me themelues Muhamet Qerimi është gjobitur me 2 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e “Star Hair Clinic”, thuhet se gjatë inspektimit është konstatuar se kjo klinikë ushtron veprimtari shëndetësore në kundërshtim me legjislacionin në fuqi, duke mos përmbushur kërkesat për kuadër profesional të licencuar dhe të regjistruar.
Po ashtu, në vendim theksohet fakti se “Star Hair Clinic” ofronte shërbime shëndetësore të palajmëruara dhe palicencuara në Divizionin për Licencim dhe Akreditim të Ministrisë së Shëndetësisë.
Veriu.info ka gjetur se ky vendim për “Star Hair Clinic” i hartuar nga inspektorja shëndetësore, Arlinda Pestisha Aliu ka dallime thelbësore në krahasim me vendimet e inspektorëve të tjerë, për faktin se në të nuk janë evidentuar të gjeturat konkrete për staf të palicencuar dhe për ushtrim të veprimtarisë shëndetësore pa licencim në DLA/MSh.
Pra, nuk ka specifikuar se kush është gjetur duke punuar pa licencim nga stafi dhe njashtu nuk ka specifikuar se cilat shërbime shëndetësore ofroheshin pa licencim, duke lënë hapësirë për interpretim në favor të “Star Hair Clinic”.
Gjithashtu në krahasim me disa institucione tjera shëndetësore që janë zbuluar duke punuar me staf të palicencuar dhe duke ofruar shërbime të palicencuara, gjoba e shqiptuar nga inspektorja Arlinda Pestisha Aliu ndaj “Star Hair Clinic” është shumë më e ulët.
Veriu.info ka kërkuar qasje nga Ministria e Shëndetësisë edhe në procesverbalin e inspektimit, por i njëjti nuk na është ofruar, ku për këtë shkelje të Ligjit për Qasje në Dokumente Publike kemi bërë ankesë në Agjencinë për Informim dhe Privatësi.
Veriu.info ka tentuar të marrë një qëndrim nga “RINU” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
