Prokurori special, Bekim Kodraliu, ka thënë për RTK-në se hetimet po shtrihen edhe te persona të tjerë, ndërsa të dyshuarit kanë një emërues të përbashkët – BIA-n serbe, e cila dyshohet se ka rekrutuar persona në Kosovë për mbledhjen dhe përcjelljen e informacioneve të ndjeshme.
“Mund të konfirmoj që të njëjtin kanë një emërues të përbashkët, ajo është BIA, e cila ka arritur të rekrutojë dhe të marrë informacione të rëndësishme sa i përket aspektit politik dhe të sigurisë në Kosovë, e në veçanti një interesim të jashtëzakonshëm sa i përket radikalizimit islamik në Kosovë dhe sekteve të ndryshme fetare”, ka deklaruar Kodraliu për RTK-në.
Hetimet, sipas Prokurorisë, kanë përfshirë dyshime për sigurimin e dokumenteve zyrtare dhe informacioneve konfidenciale. Në fokus kanë qenë të dhëna për institucionet e sigurisë, zyrtarë të Policisë Speciale, ish-eprorë të UÇK-së dhe aktorë politikë.
Prokuroria ka theksuar rëndësinë e pozitave që disa prej personave nën hetim kanë mbajtur në institucionet e Kosovës.
“Ne jemi shumë të kujdesshëm në ruajtjen e sigurisë kombëtare, për shkak edhe të pozitave që këta persona kanë mbajtur. Njëri ka qenë toger me gradë në Policinë e Kosovës në pikën kufitare në Kamenicë dhe tjetri ka qenë zyrtar i inteligjencës së policisë në veri të Mitrovicës”, ka deklaruar prokurori Kodraliu.
Këto deklarata vijnë pak ditë pas arrestimit të Fehim Salit, rasti i të cilit sipas Prokurorisë është një tjetër hallkë në hetimet për aktivitetin e dyshuar të BIA-s në Kosovë.
Sali u arrestua më 13 gusht në pikën kufitare në Merdar, nën dyshimin për spiunazh dhe bashkëpunim me shërbimin inteligjent serb. Gjykata Themelore në Prishtinë më pas i caktoi paraburgim prej 30 ditësh.
Prokurori Kodraliu ka bërë të ditur se provat e siguruara në bashkëpunim me Policinë e Kosovës dhe Agjencinë Kosovare për Inteligjencë kanë krijuar dyshim të bazuar se Sali ishte rekrutuar nga BIA, konkretisht nga zyrtari i saj, Zhelimir Matoviq.
Sipas prokurorit, vetë i dyshuari ka deklaruar se ishte rekrutuar dhe se kishte pasur kontakte të vazhdueshme me zyrtarë të BIA-s.
“I pandehuri edhe vetë deklaroi se ka qenë i rekrutuar dhe ka pasur kontakte të vazhdueshme me zyrtarë të BIA-s”, ka thënë Kodraliu.
Në kuadër të hetimeve ndaj Salit, autoritetet kanë kryer edhe bastisje në pronën e tij, ku janë sekuestruar telefona dhe para, të cilat Prokuroria dyshon se lidhen me veprimtarinë e kundërligjshme.
Rasti i Salit i shtohet një serie hetimesh dhe procedurash penale që gjatë vitit 2025 prekën disa persona të dyshuar për bashkëpunim me BIA-n serbe.
Sipas një përmbledhjeje të mëhershme të Prokurorisë Speciale, gjatë vitit 2025 ishin arrestuar katër persona për spiunazh dhe ndaj tyre ishte caktuar paraburgimi.
Në atë periudhë, Prokuroria kishte ngritur katër aktakuza ndaj pesë personave për veprën penale “Spiunazh”.
Në mesin e rasteve ishin Fatmir Sheholli, Jelena Gjukanoviq, Bojan Jevtiq dhe Hysri Selimi, ndërsa në një aktakuzë të dhjetorit ishte përfshirë edhe Jovan Viqentijeviq, i dyshuar për sulmin ndaj kanalit të Ibër-Lepencit.
Lidhur me rastin e sulmit terrorist në Ibër-Lepenc, Kodraliut ka theksuar se i dyshuari kryesor në këtë rast ka pasur lidhje me BIA-n.
Prokuroria thotë se për këtë rast janë siguruar prova shkencore, të dhëna për hyrje-daljet në Serbi, komunikime telefonike me zyrtarë të BIA-s dhe materiale të tjera që janë duke u analizuar.
Një nga rastet e përmendura nga Prokuroria është edhe ai i Fatmir Shehollit, i cili u arrestua në tetor të vitit 2025. Sipas dosjes së Prokurorisë, ai dyshohet se ka mbledhur informacione dhe ia ka përcjellë ato BIA-s përmes komunikimeve telefonike.
Sipas prokurorit Kodraliu, Sheholli dyshohet se u ka ofruar ndihmë dhe informacione strukturave të BIA-s, përfshirë zyrtarin e saj, Bojan Dimiq.
Prokuroria Speciale tashmë ka bërë të ditur se nuk mund të japë detaje për rastet që janë ende në hetim, por ka riafirmuar angazhimin për ndjekjen e veprave të spiunazhit dhe sjelljen para drejtësisë të personave që dyshohen për këto aktivitete.
