Shtatë vite pas transferimit të tij te Barcelona, marrëdhënia mes Frenkie de Jong dhe klubit katalanas duket se po kalon një nga momentet më delikate.
Në vitin 2019, Barcelona e kishte mposhtur konkurrencën e Paris Saint-Germainit dhe i kishte investuar 86 milionë euro, përfshirë bonuset, për ta transferuar nga Ajaxi njërin prej mesfushorëve më premtues të futbollit evropian.
Një investim i madh, i cili megjithatë nuk i ka dhënë kurrë plotësisht rezultatet e pritshme.
Reprezentuesi holandez, tashmë 29-vjeçar dhe me 70 paraqitje e dy gola me kombëtaren, është përballuar kohë pas kohe edhe me probleme të shumta fizike, të cilat ia pamundësuan të kishte vazhdimësi të niveleve të larta.
Që nga transferimi i tij në Kataluni, De Jong ka munguar rreth 437 ditë për shkak të lëndimeve, një shifër që ka ndikuar ndjeshëm në rrugëtimin e tij te Barcelona.
Problemi i fundit u shfaq gjatë Kupës së Botës, kur De Jong e pësoi një dëmtim në gju.
Futbollisti ka shpjeguar se fillimisht kishte marrë garanci nga stafi mjekësor i Holandës se situata nuk ishte serioze, përpara se më vonë të mësonte se dëmtimi ishte më i rëndë nga sa ishte menduar.
Lëndimi pritet ta mbajë larg fushave për rreth katër muaj dhe, ndërkohë, Barcelona e ka afruar në skuadër Rodrin, kampionin e botës dhe tashmë një pikë referimi të re në mesfushë.
Ardhja e spanjollit e ka rritur konkurrencën dhe i ka shtuar pikëpyetjet rreth së ardhmes së De Jongut.
Sipas mediave katalunase, mes De Jongut dhe klubit kanë lindur tensione të reja, të lidhura edhe me vendimin e lojtarit për ta ndjekur një terapi konservative në vend që t’i nënshtrohej ndërhyrjes kirurgjikale.
Një version ky që vetë futbollisti e ka mohuar. Situatën e ka komplikuar edhe vendimi i trajnerit Hansi Flick për të mos ia besuar për momentin shiritin e kapitenit.
Pas largimeve të Marc-André ter Stegen dhe Ronald Araújo, trajneri gjerman e zgjodhi Raphinhën si kapiten të parë, i ndjekur nga Eric Garcia dhe Pedri.
Ky vendim është interpretuar nga shumëkush si një sinjal se marrëdhënia mes lojtarit dhe ambientit të Barcelonës mund të jetë ftohur.
Gjatë prezantimit të skuadrës në Trofeun Joan Gamper, De Jong thuhet se është pritur në mënyrë shumë të ftohtë nga tifozët, në kontrast të plotë me entuziazmin e madh që u tregua ndaj Rodrit.
