Kryeministri në detyrë i Republikës së Kosovës, Albin Kurti, priti sot në takim Joe DioGuardi, kongresistin amerikan që u angazhua për vite me radhë në avokimin e të drejtave të shqiptarëve.
Pas takimit në Kryeministri, Kurti tha se DioGuardi dhe bashkëshortja e tij kanë marrë shtetësinë e Republikës së Kosovës, si pasqyrim i përkushtimit të tyre ndaj popullit shqiptar.
Mes të tjerash, Kurti shkroi:
“Ishte kënaqësi të mirëprisja Joe DioGuardi dhe Shirley Cloyes DioGuardi në Zyrën e Kryeministrit dhe t’i falënderoja për gati katër dekada avokimi të jashtëzakonshëm, nga Kongresi Amerikan deri te Lidhja Qytetare Shqiptaro-Amerikane.
Joe dhe Shirley tani, përveçse janë qytetarë të Shteteve të Bashkuara të Amerikës, janë edhe qytetarë të Republikës së Kosovës, gjë që është një pasqyrim i përkushtimit të tyre dekadash ndaj popullit shqiptar dhe kauzës sonë kombëtare.
Si Kongresisti i parë Amerikan me origjinë shqiptare, Joe DioGuardi, së bashku me figura me ndikim si Tom Lantos, Bob Dole dhe Eliot Engel, ishte ndër zërat më të hershëm dhe më të fortë për Kosovën dhe kundër shtypjes që duroi populli ynë. Ai ishte ambasador për vendin tonë shumë kohë përpara se Ambasada e Republikës së Kosovës të qëndronte me krenari në Uashington, D.C.
Ne do të jemi përgjithmonë mirënjohës për shërbimin e tyre, si vend dhe si popull”.
