Kompania “Professional Alarm LLC” ka dorëzuar ankesë në Organin Shqyrtues të Prokurimit (OSHP) ndaj KRU “Mitrovicës” të udhëhequr nga kryshefi Bashkim Kurti, lidhur me aktivitetin e prokurimit “Furnizim dhe montim të sistemit të sigurimit nëpër Stacione të Pompimit dhe Rezervuar”, me vlerë të parashikuar prej 200 mijë eurosh, shkruan rajoni.org.
Kompania “Professional Alarm LLC” në ankesën e saj pretendon se disa nga kërkesat teknike dhe kriteret e vendosura në dosjen e tenderit janë tepër specifike dhe, sipas saj, mund të kufizojnë pjesëmarrjen e operatorëve të tjerë ekonomikë. Sipas saj, specifikimet janë hartuar në mënyrë që përputhen në detaje me produkte të caktuara të kompanisë TP-Link, duke ngritur dyshime se konkurrenca në këtë tender mund të jetë kufizuar.
Cilat janë pretendimet e Operatorit në OSHP?
Kompania pretendon se specifikimet i përshtaten produkteve të caktuara
Sipas ankesës së “Professional Alarm LLC”, një nga çështjet kryesore lidhet me pozicionin për “Sistemin inteligjent të furnizimit me energji solare”.
Kompania pretendon se kombinimi i kërkesave teknike, si panelet fotovoltaike me fuqi minimale prej 180 W, bateritë litium me kapacitet minimal prej 93 Ah, ngrohja inteligjente e baterisë, menaxhimi përmes LAN-it, mundësia e rindezjes nga distanca, njoftimet automatike, përditësimi i softuerit nga distanca dhe monitorimi në kohë reale, përputhen me produktin TP-Link VIGI SP18090.
Sipas “Professional Alarm”, kombinimi i të gjitha këtyre karakteristikave në një specifikim të vetëm ngushton numrin e produkteve dhe prodhuesve që mund të plotësojnë kërkesat e tenderit.
Kompania kundërshton edhe kërkesën për autorizim të dedikuar nga prodhuesi (MAF) për këtë projekt, së bashku me garancinë minimale 24-mujore për setin e kamerave dhe softuerin për menaxhimin qendror të sistemit të mbikëqyrjes.
Sipas operatorit, kur një kërkesë e tillë kombinohet me specifikime që, sipas saj, i përshtaten një prodhuesi të caktuar, krijohet rreziku që operatorët e tjerë ekonomikë të mos kenë mundësi reale për të konkurruar.
Kundërshtohet edhe specifikimi për routerin 4G
Një tjetër pretendim i kompanisë lidhet me pozicionin nr. 2 në dosjen e tenderit, përkatësisht pajisjen Outdoor 4G Gateway/Router.
“Professional Alarm LLC” pretendon se kombinimi i kërkesave teknike, duke përfshirë LTE Cat 6, Wi-Fi 6, PoE In, 2×PoE Out, SD-WAN, platformë SDN, zbulim automatik të pajisjeve, konfigurim të unifikuar, WireGuard dhe SSL VPN, është aq specifik sa përputhet me një model të caktuar të prodhuesit TP-Link.
Në ankesë përmendet konkretisht modeli ER703WP-4G-Outdoor, për të cilin kompania pretendon se i plotëson të gjitha kërkesat e përcaktuara në tender.
Sipas ankuesit, kjo mënyrë e përcaktimit të specifikimeve mund të kufizojë konkurrencën dhe të favorizojë prodhues ose produkte të caktuara.
Edhe kamera PTZ pretendohet se përputhet me një model të TP-Link
Në pretendimin e tretë, kompania fokusohet te Pozicioni nr. 3 dhe kërkesat për kamerën PTZ.
Sipas “Professional Alarm LLC”, kombinimi i parametrave të përcaktuar në dosjen e tenderit përputhet në mënyrë të konsiderueshme me modelin TP-Link VIGI InSight PTZ5425.
Në ankesë përmenden, ndër të tjera, karakteristikat si zoom optik 25X, zoom digjital 16X, rrotullim 360°, kënd vertikal -20° deri në 90°, 300 pozicione të paracaktuara, ndriçim IR deri në 100 metra dhe dritë të bardhë deri në 50 metra.
Kompania pretendon se këto specifikime përputhen në mënyrë të plotë me modelin e caktuar dhe se kjo krijon dyshime për kufizim të konkurrencës.
Kundërshtohet edhe kamera panoramike
Pretendimi i katërt lidhet me Pozicionin nr. 4.
Sipas kompanisë ankuese, parametrat e përcaktuar në dosjen e tenderit përputhen me produktin TP-Link VIGI InSight S385DPS.
Në ankesë përmenden specifikime si rezolucioni 5456×1520, mbulimi panoramik 180°, ndriçimi IR dhe drita e bardhë deri në 50 metra, si dhe funksione të tjera të avancuara të kamerës, përfshirë klasifikimin e njerëzve dhe automjeteve dhe funksione të zbulimit të aktiviteteve.
Sipas “Professional Alarm”, edhe në këtë rast kombinimi i kërkesave teknike mund të krijojë një kufizim artificial të konkurrencës, duke favorizuar operatorët që disponojnë ose përfaqësojnë produktin konkret.
Kundërshtohet edhe kërkesa për autorizim të dedikuar nga prodhuesi
Një tjetër pikë e ankesës është kërkesa që operatorët ekonomikë të dorëzojnë autorizim të dedikuar për këtë projekt nga prodhuesi, së bashku me garancinë minimale prej 24 muajsh.
“Professional Alarm LLC” nuk e kundërshton domosdoshmërisht qëllimin e një kërkese të tillë, por kërkon që të vlerësohet efekti real i saj në konkurrencë.
Sipas kompanisë, nëse specifikimet teknike janë përshtatur me një prodhues të caktuar dhe njëkohësisht kërkohet autorizim i dedikuar për projektin, kjo mund të krijojë një barrierë praktike për operatorët e tjerë ekonomikë, shkruan rajoni.org.
