Sekretari i Përgjithshëm i Aleancës, Avni Arifi, ka deklaruar se kryeministri në detyrë, Albin Kurti, nuk është takuar me përfaqësuesit e Aleancës që kur kjo parti i kishte dërguar ofertën për bashkëpunim.
Në emisionin FIVE, Arifi tha se që nga ajo kohë Kurti nuk i ka ftuar në takim dhe, sipas tij, as nuk ka dhënë përgjigje për gjashtë pikat e propozuara nga Aleanca.
“Ne më 26 qershor e kemi bërë ftesën. Prej 26 qershorit ka kaluar një muaj, ai as nuk na ka përfillur, bile i ka vendosur disa deputetë me na fyer se jemi parti e vogël. Ai është dashur të na ftojë, ne më 26 qershor ia kemi bërë ofertën. Ai është dashur të flasë diçka, bile të thotë që këto gjashtë pika nuk mundem, nuk dua, nuk janë pjesë e programit tim. Ai as nuk ka dashur të flasë për këtë punë”, tha Arifi.
Arifi tha se Aleanca ka ofruar mundësi për sigurimin e shtatë votave, duke mohuar pretendimet se partia e tij i ka vendosur kushte Kurtit dhe nuk ka pranuar të takohet me të.
“Nuk mund të thuash që Aleanca i ka vendosur kushte edhe nuk i ka shkuar kryeministrit. Të dyja janë rrena të pasakta. Ne i kemi ofruar mundësi shumë të lehtë për të pasur ato shtatë vota”, deklaroi ai.
Sipas Arifit, Aleanca nuk është tërhequr nga gjashtë pikat e propozuara dhe Kurti ende mund të kërkojë diskutimin për to.
“Nuk ka zyrtar të Aleancës që është tërhequr nga këto gjashtë pika. Ka ende kohë, ai mund të thotë edhe sot të diskutojmë për këto gjashtë pika. Nuk ka skaduar ende, ose nuk ka qëndrim zyrtar që ne jemi tërhequr nga oferta jonë prej gjashtë pikësh”, tha ai.
Ai shtoi se nëse Kurti vazhdon t’i injorojë ofertat e Aleancës, atëherë përgjegjësia për sigurimin e votave dhe zgjidhjen e ngërçit institucional mbetet tek ai.
“Kurti po dëshiron t’i injorojë ofertat tona, atëherë le t’i bëjë votat”, u shpreh Arifi.
Arifi e krahasoi situatën aktuale edhe me zgjedhjet e kaluara, duke thënë se edhe atëherë Kurti kishte vlerësuar se nuk kishte nevojë për Aleancën dhe vendi kishte përfunduar në zgjedhje.
“E njëjta Aleancë është edhe nga zgjedhjet e kaluara. As herën e kaluar nuk ka thënë që i duhemi, e ka dërguar vendin në zgjedhje. Edhe kësaj here po thotë që nuk i duhemi. Në rregull, dërgoje vendin në zgjedhje”, tha Arifi.
