Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një klinikë estetike në Ferizaj që është gjobitur nga Inspektorati Shëndetësor.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin subjekti privat shëndetësor “Dermao By Simoneta” Sh.P.K. me themelues Simoneta Bajrami është gjobitur me 5 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e “Dermo By Simoneta”, thuhet se inspektimi është realizuar më 12 shkurt 2026 me kërkesë të Drejtorisë për Hetimin e Krimeve Ekonomike dhe Korrupsionit (DHKEK), të Policisë së Kosovës për Rajonin e Ferizajit dhe në bashkëpunim edhe me Inspektoratin Farmaceutik.
Gjatë këtij inspektimi është konstatuar se në këtë subjekt ofrohen shërbime të mjekësisë estetike, përfshirë fillerë dermalë, Mezo dhe Botox pa licencë valide prej vitit 2022.
“Në kohën e inspektimit nuk u prezentua licenca e institucionit, as licenca të stafit shëndetësor, pra ky institucion ofronte shërbime shëndetësore pa licencë nga Divizioni për Licencim dhe Akreditim të Institucioneve Private Shëndetësore, të Ministrisë së Shëndetësisë. Në hapësirat e këtij institucioni u gjetën produkte mjekësore injektabile – Fillerë Dermal, Botox dhe Mezoterapi dhe disa dosje të aplikimit të injektimit të vitaminave për flokë, nuk posedon Anti shokë terapi dhe as kontratë për asgjësimin e mbetjeve mjekësore. Nuk posedonte regjistër të pacientëve adekuat sipas Udhëzimit Administrativ Nr. 02/2010 për Dokumentet Shëndetësore, apo ndonjë formë elektronike për ruajtjen e të dhënave të pacientëve”, thuhet në vendimin e siguruar nga Veriu.info.
Pra, nga ky inspektim është konstatuar se “Dermo By Simoneta” ofroheshin pa licencë: filler dermal, Botox, Mezoterapi dhe injektim të vitaminave për flokët.
Inspektorët shëndetësorë në “Dermo By Simoneta” të Simoneta Bajramit kishin gjetur fletore jozyrtare dhe dosje të personave që kishin marrë shërbime estetike mjekësore të karakterit invaziv.
Përkundër këtyre të gjeturave skandaloze, Inspektorja Shëndetësore Vjollca Jusufi në vendim nuk ka evidentuar se aktiviteti i klinikës “Derma By Simoneta” është ndërprerë.
Veriu.info ka kërkuar nga Inspektorati Shëndetësor qasje në procesverbalin e këtij inspektimi, por i njëjti nuk na është ofruar, duke shkelur Ligjin për Qasje në Dokumente Publike.
Përkundër gjobitjes për ofrimin e këtyre shërbimeve mjekësore pa licencë, “Derma By Simoneta” e Simoneta Bajramit ka vazhduar ofrimin e të njëjtave javëve dhe muajve në vazhdim pas këtij vendimi të Inspektoratit Shëndetësor.
Veriu.info ka tentuar të marrë një qëndrim nga “Derma By Simoneta” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
