Nëse shpifja do të ishte vepër penale, ministrja Artane Rizvanolli, bashkë me drejtorin e Trainkos-it, Agron Statovcin, në këto momente do të ishin prapa grilave. Dokumentet e siguruara nga Insajderi dëshmojnë se Rizvanolli e Statovci më 24 gusht të këtij viti lansuan një vagon rrenash në publik. Dosja vërtetoi se “Profitech” edhe zyrtarisht ishte autorizuar nga kompania serbe “Shin Voz” për të konkurruar në tenderin për riparimin e vagonëve, të vitit 2024.
Në përpjekje për ta heshtur skandalin e dërgimit të vagonëve në Serbi për riparim, Rizvanolli dhe Statovci u koordinuan për të lansuar një të pavërtetë të madhe.
E nisi kryeshefi Statovci përmes një postimi në faqen zyrtare të Trainkosit në Facebook.
Shkruante se nuk kishte dijeni se vagonët do të dërgoheshin në Serbi. Pohonte se pas publikimit të skandalit, ndërmarrja Trainkos ia ka dërguar një pyetje kompanisë “Profitech”, një prej përfituesve në tenderë.
“Cila është arsyeja që vagonët janë dërguar në Serbi për riparim”, ishte pyetja që Trainkos pohonte se iu bë firmës “Profitech”.
Kjo ishte një përpjekje për të mashtruar qytetarët kinse pushteti i Kurtit nuk ishte në dijeni se çfarë kishte ndodhur.
Këtë postim të Trainkos e shpërndau menjëherë ministrja Rizvanolli. Ajo nuk e la më keq.
E bëri edhe një video kinse po i informon qytetarët.
“Vajtonte”, kinse problemi është te Ligji i Prokurimit Publik i cili nuk lejon ndërmarrjet që të ndërhyjnë se kënd e angazhon si nënkontraktor fituesi i tenderit.
Por, e vërteta është krejt ndryshe. E dëshmon dosja e tenderit.
“Shin Vozi” i Zrenjanit nuk është nënkontraktues i kompanisë “Profitech”. Është e kundërta.
Bazuar në dosjën e tenderit, të siguruar nga Insajderi, përmes qasjes në dokumente publike, Profitech është veç i autorizuar i “Shin Voz” për të konkurruar në tenderin për riparimin e vagonëve, të vitit 2024.
Dosja e tenderit është e mbushur me dokumente në gjuhën serbe. Madje ka edhe në çirilicë. Disa janë në gjuhën angleze. Në gjuhën shqipe ka shumë pak dokumente.
Dokumentët tregojnë se konkurresi në tender është Shin Voz, jo Profitech.
Kompania kosovare është veç e autorizuar apo nënkontraktor siç preferonte Rizvanolli ta quante kompaninë serbe.
Oferta është përgatitur dhe dorëzuar nga Shin Voz. Profitech vec e ka dorëzuar në Trainkos. Madje për këtë, Shin Voz i ka dërguar dokument se kush është i autorizuari i tyre.
“Përmes kësaj autorizojnë PROFITECH sh.p.k. të dorëzojë ofertën, si dhe më pas të negociojë dhe të nënshkruajë Kontratën me ju”, thuhet në dokumentin që mbanë datën 28 mars 2024.
Dokumenti ka vulën dhe nënshkrimin e drejtorit të kompanisë serbe.
Po ashtu, në Trainkos dorëzohet edhe dokumentit tjetër. Është marrëveshja e lidhur mes Shin Voz e Profitech. Aty ceket edhe roli i firmës kosovare.
Është thjeshtë e autorizuar vetëm për të dorëzuar ofertën e kompanisë serbe, për të negociuar në emër të saj si dhe për të lidhur kontratë me Trainkos në emër të “Shin Voz”.
Asnjë detyre tjetër nuk e ka firma kosovare. Vetëm i autorizuar i Shin Voz.
Lista e punëtorëve që kanë punuar në riparimin e trenit, e dorëzuar nga Sinvoz për Trainkos
Riparimi i këtyre vagonëve u finalizua në dhjetor të vitit 2024, rreth 10 muaj pasi kompania fituese kishte dërguar vagonët për riparim në Zrenjanin të Serbisë, tek një kompani serbe.
Sipas kompanisë kosovare “Profitech”, vetëm kompania serbe kishte mundësi t’i kryente riparimet përkatëse. Ndërkohë, në kontratën e publikuar në e-Prokurim, objekti i tenderit përshkruhet si “riparimi i mesëm i vagonëve të transportit të udhëtarëve”, ndërsa nuk specifikohet se punimet do të kryheshin nga një nënkontraktor në Serbi.
Por, pas një hulumtimi që Gazeta Insajderi ka realizuar, del se riparime të ngjashme mund të kryheshin edhe në disa shtete të tjera të rajonit, përfshirë Bullgarinë, Rumaninë, Hungarinë, Kroacinë dhe Sllovakinë.
Këto janë kompanitë e vendeve të tjera që, sipas kapaciteteve të tyre të publikuara, mund të kryejnë riparimin apo mirëmbajtjen e vagonëve:
