Avokati Arianit Koci ka njoftuar se gazetari Lirim Mehmetaj i është nënshtruar sot në mëngjes një testi për praninë e substancave narkotike, lidhur me videon e manipuluar që është shpërndarë në rrjetet sociale.
Koci ka thënë se, në një situatë ku pretendohet për manipulime, vendimi i parë ka qenë që të veprohet me prova dhe jo vetëm me deklarata.
“Veprimi i parë që kemi ndërmarrë me Lirimin ka qenë testi për praninë e substancave narkotike”, ka shkruar Koci.
Sipas tij, testi është kryer sot në mëngjes, ndërsa rezultatet pritet të dalin gjatë pasdites dhe, siç ka paralajmëruar avokati, do të bëhen publike.
Koci ka paralajmëruar gjithashtu se pas publikimit të rezultateve do të kërkohet përgjegjësi nga secili person që, sipas tij, ka marrë pjesë në manipulimin e videos.
“Ta shohim kush po manipulon e kush po flet me prova”, ka përfunduar Koci.
