Kryeministri në detyrë, Albin Kurti, është deklaruar para nisjes së seancës konstituive të Kuvendit të Kosovës.
Kurti ka thënë se një marrëveshje politike ekziston, por sipas tij, ajo duhet të sigurojë edhe votat e nevojshme për zgjedhjen e presidentit, në mënyrë që të shmangen zgjedhjet e reja.
“Marrëveshje politike kemi, këtë e kemi kërkuar, por natyrisht që marrëveshja politike duhet të na sigurojë edhe numrat për presidentin, në mënyrë që t’i shmangim zgjedhjet e reja”, ka deklaruar Kurti.
Ai ka theksuar se vetëm konstituimi i Kuvendit dhe formimi i Qeverisë nuk mjaftojnë për të shmangur zgjedhjet e reja, nëse nuk arrihet të zgjidhet edhe presidenti.
Sipas Kurtit, për zgjedhjen e presidentit nevojitet prania e dy të tretave të deputetëve në Kuvend.
Ai ka thënë se për kandidatin e përbashkët të propozuar nga Vetëvendosje e LDK, Bekim Sejdiu, nevojiten të gjithë deputetët e marrëveshjes politike, ose deputetë shtesë.
“Por meqë kryesuesi i Kuvendit, Avni Dehari, e ka thirrur seancën konstituive, ne i përgjigjemi pozitivisht asaj”, ka deklaruar Kurti.
