Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi gjetur se edhe një laborator në Pejë është gjobitur rëndë.
Veriu.info ka siguruar një vendim të Inspektoratit Shëndetësor të nxjerrë me 2 qershor 2026, me të cilin “Laboratori Klinik Shëndeti” është gjobitur me 6 mijë euro për shkelje të Ligjit për Shëndetësi.
Në arsyetimin e vendimit bëhet e ditur se inspektimi në “Laboratori Klinik Shëndeti”, Laborator Mjekësor Biokimik-Hematologjik në Pejë është realizuar më 21 maj 2026, ku është konstatuar se aty ofroheshin shërbime të Biokimisë dhe Hematologjisë të cilat nuk janë të licencuara në Divizionin për Licencim dhe Akreditim të Ministrisë së Shëndetësisë.
Po ashtu gjatë inspektimit është hasur në teste rapide të Biokimisë dhe Mikrobiologjisë, ku sipas inspektorëve shëndetësorë, ato kanë qenë të destinuara për shërbime të cilat nuk janë të lajmëruara e as licencuara.
“Në momentin e inspektimit në Institucionin Privat Shëndetësor “Laboratori Klinik Shëndeti” nuk ishte prezent specialisti i Biokimisë Klinike dhe rezultatet u pa se lëshoheshin tek pacientët pa prezencën e Specialistit të Biokimisë Klinike, duke përdorur kopje të faksimilit dhe nënshkrimit të Dr. Gresa Hoti Zajmi”, thuhet në arsyetimin e vendimit të siguruar nga Veriu.info.
Të gjeturat skandaloze në “Laboratori Klinik Shëndeti” nuk përfundojnë me kaq, pasi që aty inspektorët kanë konstatuar se përveç specialistit të Biokimisë Klinike, nuk ishin prezent as pjesa tjetër e kuadrit profesional të lajmëruar në sistemin online DLA/MSh si pjesë e kuadrit profesional në këtë institucion privat shëndetësor.
“Në momentin e inspektimit prezent ishte vetëm z. Miradie Hajzeraj, themeluesja e IPSH “Laboratori Klinik Shëndeti” dhe nga njëta ishin lëshuar rezultate të analizave tek pacientët G.O, F.O, F.H, edhe pse e njëjta sipas DLA/MSh nuk është pjesë e kuadrit profesional në këtë institucion”, thuhet në arsyetimin e vendimit për gjobitjen e këtij institucioni privat shëndetësor.
Gjatë këtij inspektimi në “Laboratori Klinik Shëndeti” janë gjetur edhe reagentë me afat të skaduar.
Si shkelje tjetër e dispozitave ligjore të shëndetësisë është konstatuar edhe fakti se në këtë laborator edhe Antishok terapia nuk ishte e kompletuar dhe ishte me afat të skaduar (Aminophylline dhe Adrenaline).
Veriu.info ka tentuar të marrë një qëndrim nga “Laboratori Klinik Shëndeti” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
