Veterani i Ushtrisë Çlirimtare të Kosovës, Dardan Krasniqi, ka bërë thirrje për bashkim dhe solidaritet shoqëror, duke u kërkuar qytetarëve që më 12 shtator të marrin pjesë në marshin e paralajmëruar në mbështetje të ish-pjesëtarëve të UÇK-së dhe familjeve të tyre.
Krasniqi në Kanal 10, folipër situatën politike dhe shoqërore në Kosovë, si dhe për proceset që po zhvillohen në Hagë ndaj ish-pjesëtarëve të UÇK-së.
Ai tha se Kosova ka përgjegjësi ndaj brezave të ardhshëm dhe se, sipas tij, vendi po përballet me një çoroditje të madhe, e cila nuk mund të trajtohet vetëm përmes debatit politik.
“E kemi për borxh me punu në këtë vend për brezat e ardhshëm. Është tu ndodhë një çoroditje e madhe”, deklaroi Krasniqi.
Duke folur për Gjykatën Speciale, Krasniqi tha se, sipas tij, faktorët politikë brenda Kosovës kanë pasur rol në krijimin e një klime që ka ndikuar në këtë proces.
“Normalisht, kjo Gjykatë ka fillu për shkak të egos, faktorit politik këtu brenda. Kemi pasë deputetë që kanë dalë në Kuvendin e Kosovës edhe kanë kërku dënimin e përjetshëm të këtyre njerëzve”, tha ai.
Sipas tij, debati për këto çështje duhet të zhvendoset nga përplasjet politike drejt zhvillimit të vendit dhe forcimit të institucioneve.“Edhe kjo duhet që na ta kthenim debatin në zhvillim”, u shpreh Krasniqi.
Ai kritikoi edhe gjendjen e brendshme në Kosovë, duke thënë se problemet me të cilat përballet shoqëria nuk janë vetëm politike.“E them diçka shumë të trishtë. E kuptoj momentumin politik dhe çdo shkronjë të cilën e thoni e kuptoj, por problemet nuk janë politike, janë psikologjike”, deklaroi ai.
Krasniqi tha se, në vend të forcimit të institucioneve, ekonomisë, arsimit dhe shëndetësisë, Kosova vazhdon të përballet me përçarje dhe probleme të pazgjidhura.“Sot armiku i shqiptarëve nuk është Serbia, jemi vetë ne, për arsye se nuk po arrijmë me i konstitu institucionet e konsoliduara, ekonomi të fortë, arsim, shëndetësi”, tha veterani i UÇK-së.
Krasniqi bëri thirrje për bashkim dhe pjesëmarrje në marshin e 12 shtatorit.“Andaj i ftoj qytetarët që më 12 shtator me dalë në marsh. Mbështetje morale u kemi borxh”, përfundoi ai.
