Ish-banorja e “Big Brother VIP Kosova 4”, Alba Pollozhani, ka reaguar ashpër përmes rrjeteve sociale, pasi sot ka marrë vesh për një situatë që, sipas saj, lidhet me mënyrën se si po shitet Kurani në disa komuna shqiptare me shumicë myslimane.
Përmes disa postimeve në “InstaStory”, Alba ka treguar se është befasuar kur ka mësuar se, sipas saj, në disa xhami nuk mund të gjendet Kurani, ndërsa ai mund të blihet në librari.
“Sot kam marrë vesh budallallëkun numër një edhe jam befasuar. Mora vesh që në disa komuna shqiptare myslimane, Kuran nuk mund të gjesh nëpër xhami, por i gjeni në libraritë e shqiptarëve myslimanë që po e shesin Kuranin me lekë”, ka shkruar Pollozhani.
Ajo ka kritikuar ashpër këtë praktikë, duke e cilësuar si të papranueshme përdorimin e fjalëve të Zotit për përfitime materiale.
“Turp edhe haram për gjithë ju shqiptarët myslimanë që i keni marrë fjalët e Zotit t’i përdorni për biznes! Edhe turp edhe haram edhe gjithë ju xhamitë dhe sistemi i gjithë pjesës së fesë myslimane që po e lejoni këtë fenomen që të ndodhë!”, ka deklaruar ajo.
Alba ka vijuar duke u bërë thirrje institucioneve dhe personave përgjegjës në komunitetin fetar që të mos lejojnë që ky fenomen të vazhdojë.
“Vazhdoni akoma lejojeni këtë fenomen që njerëzit të blejnë Kuranin me para dhe t’i tregoni botës që feja myslimane, fjalët e Zotit qenkan biznes. Turp t’ju vijë për haramin që bëni!”, ka shkruar ish-banorja.
Në reagimin e saj, ajo ka theksuar gjithashtu se personat që mbajnë pozita përgjegjëse në komunitetin fetar duhet të jenë më të kujdesshëm, sidomos nëse synojnë që të afrojnë më shumë njerëz me fenë islame.
“Dhe prisni ju që të tërheqni sa më shumë njerëz në fenë myslimane sepse feja myslimane është më e pastër, po pikërisht ju që jeni në pozita duhet të jeni më të kujdesshëm që të mos lejoni këtë fenomen, që njerëzit të mendojnë se fjalët e Zotit janë para edhe janë biznes! Nuk ka pastërti aty, aty ka vetëm haram nga ana juaj!”, ka përfunduar Alba.
Në një tjetër postim, ajo ka reaguar edhe ndaj një personi që, sipas saj, është ndjerë i prekur nga qëndrimi i saj. Alba ka argumentuar se një mysliman i devotshëm duhet ta kuptojë se risku është i caktuar nga Zoti dhe se përfitimi financiar nuk duhet të lidhet me shitjen e Kuranit.
“Edhe i paska ngelur hatri një myslimani të devotshëm që ka Kuran në dorë dhe me bën lekë nga Kurani, por një mysliman i pastër e di shumë mirë që Zoti e ka caktuar riskun për të gjithë. Nuk ka ngelur risku në këtë jetë për me fitu para nëpërmjet Kuranit”, ka shkruar ajo.
Kujtojmë se, shumë kohë më parë, gjatë qëndrimit të saj në “Big Brother VIP Kosova 4”, Alba kishte folur edhe për dëshirën për të vendosur shaminë.
Në një nga netët Prime, pak para se të eliminohej nga gara, ajo kishte shprehur dëshirën për t’u mbuluar sipas rregullave të fesë islame. Deklarata e saj në atë kohë kishte tërhequr vëmendjen e publikut dhe kishte ngjallur reagime të shumta.
Më vonë, Alba kishte sqaruar përmes rrjeteve sociale se kjo ishte një dëshirë personale dhe pjesë e një rrugëtimi të saj shpirtëror.
Ajo kishte treguar se ishte konsultuar edhe me njerëz të ditur të fesë, të cilët e kishin këshilluar që këtë proces ta ndiqte gradualisht.
Sipas saj, vendosja e shamisë nuk ishte thjesht një ndryshim i jashtëm, por një përgjegjësi shpirtërore që kërkon përgatitje të brendshme, durim dhe përkushtim.
Me reagimin e saj të fundit, Alba ka rikthyer në vëmendje raportin e saj me fenë, ndërsa deklaratat e forta të saj pritet të ngjallin diskutime të shumta në rrjetet sociale.
