sh-kryeprokurori i Dhomave të Specializuara të Hagës, Jack Smith, po vazhdon të dëshmojë sot përpara Kongresit amerikan. Smith po merret në pyetje nga kongresistët republikanë për ndjekjen që ia kishte bërë presidentit amerikan, Donald Trump, meqë ata konsiderojnë se ai ka abuzuar me detyrën.
Në një moment përgjatë marrjes në pyetje, kongresmeni Eric Schmitt e pyet Smithin nëse ka pasur raste në karrierën e tij që i ka humbur.
Ish-Kryeprokurori i Hagës në përgjigjen e tij në seancën dëgjimore e pranon që ka humbur raste në karrierën e tij.
Pas kësaj, ndërhyn kongresmeni amerikan Schmitt duke e pyetur për punën e tij në Hagë dhe ndjekjen që ia kishte bërë ish-presidentit kosovar, Hashim Thaçi.
Smith thotë se për këtë rast, Hashim Thaçi sapo është dënuar për 300 viktima të torturës dhe 96 vrasje të paligjshme.
“Pasi i humbët të gjitha këto raste të nivelit të lartë, ju shkuat në Hagë për ta ndjekur presidentin e Kosovës në vitin 2020”, pyet Schmitt.
“Po, dhe ai është dënuar për mbi 300 raste të torturës dhe 96 vrasje”, përgjigjet Smith.
I pyetur nëse ky ishte një shans që e shfrytëzoi për t’iu kthyer Trumpit, Smith e mohon një gjë të tillë.
