Ismet Kryeziu nga Instituti i Kosovës për Drejtësi ka rikujtuar se kanë mbetur edhe shtatë ditë për arritjen e një marrëveshjeje politike, para se vendi të shkojë për herë të katërt në zgjedhje.
“Edhe 7 ditë mundësi për marrëveshje politike, para se vendi të shkojë për herë të katërt në zgjedhje”, shkroi Kryeziu në krye të një postimi në Facebook.
Ai tha se Kosova për rreth dy vjet përballet me kriza institucionale, zgjedhje të përsëritura dhe institucione që funksionojnë me mandate në detyrë.
“Për rreth dy vjet, vendi përballet vazhdimisht me kriza institucionale, me zgjedhje të përsëritura dhe me institucione që vazhdojnë të funksionojnë me mandate në detyrë. Në këto rrethana, përgjegjësia politike nuk mund të shpërndahet në mënyrë të barabartë. Ajo bie para së gjithash mbi subjektin që ka mandatin më të madh politik dhe që udhëheq qeverisjen e vendit. Sa më e madhe fuqia politike, aq më e madhe është edhe përgjegjësia për të gjetur zgjidhje”, shkroi ai.
Kryeziu ka argumentuar se zgjedhja e një presidenti nga radhët e opozitës nuk do të nënkuptonte humbjen e mandatit të Qeverisë për të qeverisur.
“Nëse pozita e Presidentit i lihet opozitës dhe zgjidhet një personalitet që respekton Kushtetutën dhe mund të garantojë funksionimin institucional, Qeveria nuk humb mandatin e saj për të qeverisur. Presidenti nuk është një ‘kryeministër i dytë’, ndërsa kompetencat e tij kushtetuese nuk e bëjnë automatikisht pengesë për ushtrimin e mandatit të Qeverisë”,tha Kryeziu.
Ai i ka drejtuar një pyetje Lëvizjes Vetëvendosje lidhur me prioritetin që duhet t’i jepet pozitës së Presidentit dhe funksionimit të institucioneve.
“Prandaj, pyetja që duhet t’i bëhet VV-së është e thjeshtë: a është kontrolli i pozitës së Presidentit më i rëndësishëm sesa funksionimi i institucioneve dhe shmangia e zgjedhjeve të katërta brenda dy vitesh? Nëse një kompromis për zgjedhjen e Presidentit e zhbllokon shtetin, i bën institucionet funksionale dhe i shmang edhe një palë tjetër zgjedhjesh, pasojat ekonomike e politike, atëherë cila është arsyeja për të mos u bërë ky kompromis?”, ka shkruar ai.
Në fund, Kryeziu tha se një fitore e madhe në zgjedhje nuk nënkupton autorizim për bllokimin e institucioneve.
“Një fitore e madhe elektorale nuk është autorizim për ta mbajtur shtetin peng të vullnetit të një lideri apo të një subjekti politik. Mandati për të qeverisur nënkupton edhe përgjegjësinë për të ndërtuar institucione funksionale, për të bërë kompromis dhe për të gjetur zgjidhje politike kur sistemi bllokohet”.
