Kryeziu ka thënë se Kosova nuk mund të shkojë vazhdimisht në zgjedhje, duke e cilësuar një situatë të tillë si të papranueshme dhe të palejueshme.
“Nuk e kemi luksin të shkojmë vazhdimisht në zgjedhje. Kjo është e papranueshme e palejueshme. Nuk guxojmë këtë veprim. Deputetët duhet që brenda kësaj kohe të shkurtër ta zgjedhin presidentin”, ka deklaruar Kryeziu.
Gjykata Kushtetuese, në aktgjykimin e publikuar, ka konstatuar se Kuvendi i Kosovës është konstituuar pas kalimit të afatit 30-ditor të përcaktuar me Kushtetutë. Megjithatë, sipas vendimit, kjo nuk e bën të pavlefshme zgjedhjen e Qeverisë.
Kryeziu ka kërkuar që deputetët ta shfrytëzojnë afatin kushtetues për zgjedhjen e presidentit, duke paralajmëruar se në të kundërtën vendi mund të shkojë në zgjedhje të parakohshme.
Nëse Kuvendi nuk arrin ta zgjedhë presidentin brenda afatit të përcaktuar, ai shpërndahet sipas Kushtetutës, ndërsa zgjedhjet e parakohshme duhet të mbahen brenda 45 ditësh.
