Kryeministri i Kosovës, Albin Kurti, ka përshëndetur votimin e deklaratës së miratuar të hënën në Kuvendin e Kosovës kundër Gjykatës Speciale.
Kurti ka thënë se do të bëjë “çfarëdo që mundet dhe dinë” për korrigjimin e aktgjykimit të 16 shtatorit, duke e cilësuar atë si të padrejtë.
“Të dielën kam zhvilluar takime të ndara me kryetarët e PDK-së dhe LDK-së për të diskutuar lidhur me veprimet e përbashkëta në raport me aktgjykimin e padrejtë të 16 shtatorit”, ka deklaruar Kurti.
Ai e ka cilësuar deklaratën e miratuar me 99 vota për si “hapin e parë të përbashkët” dhe si shprehje të vullnetit të popullit.
“Mirëpres dhe përshëndes këtë hap fillestar, ndërsa thërras për bashkëpunim të ngushtë ndërmjet subjekteve politike parlamentare për këtë çështje të interesit shtetëror, duke bashkërenduar me kujdes veprimet me ekipet mbrojtëse sikurse edhe me ekspertë të fushës që të mos gjendemi në situata ku vendimet tona do të mund të përdoreshin si rëndesë ose dëm të katërshes Thaçi, Veseli, Selimi e Krasniqi”.
Kryeministri ka theksuar se do të angazhohet së bashku me partitë politike për të ndërmarrë veprime lidhur me aktgjykimin.
“Si kryeministër i Republikës së Kosovës do të bëjmë gjithfarë që dimë e mundemi, me kolegët nga Qeveria dhe jo vetëm, për korrigjimin e këtij aktgjykimi kur të vijë apeli dhe drejt tij”, është shprehur ai.
Kurti ka folur edhe për situatën e krijuar pas aktgjykimit të Gjykatës Kushtetuese, duke e cilësuar atë si urgjente dhe që kërkon veprim të përbashkët.
“Aktgjykimi i Gjykatës Kushtetuese na vë përpara një situate urgjente për veprim. Ne kemi një marrëveshje me LDK-në, por e dimë që ajo u shkel dhe u braktis”, ka deklaruar Kurti.
Ai ka përmendur edhe afatin prej gjashtë ditësh për vendosjen e presidentit të Kosovës.
“Kemi edhe gjashtë ditë të plota për vendosjen e presidentit. Andaj, le të ulemi bashkë”, ka përfunduar Kurti.
