Kryeministri Albin Kurti tha se nuk ka komunikuar se kryetarin e LDK-së, Lumir Abdixhiku pasi marrëveshja e arritur me të që Bekim Sejdiu të jetë kandidat i përbashkët për President u bë e parealizueshme kur 6 deputetë të LDK-së dolën kundër marrëveshjes.
Kurti tha në një konferencë për media se Abdixhiku “e ka kry punën”, por e kritikoi veçanërisht atë për faktin që “18-shi” i deputetëve të LDK-së “ra në 12”.
“Tash, kryetari i LDK-së është e vërtetë që e ka kry punën, por ku ka negociuar me mua ka negociuar në emër të 18 deputetëve. Marrëveshja u bë në emër të 18 deputetëve, vendimi i Kryesisë së LDK-së është në emër të 18 deputetëve. Dhe mandej ky 18-shi ra në 12 dhe na e pamundësoi zgjedhjen e Bekim Sejdiut”, tha ai.
Kurti tha se do të duhej të konsiderohej se LDK-ja ia ka LVV-së “borxh 6 deputetë”.
“Tash në çdo situatë të ngjashme duhet të konsiderohet që Lidhja Demokratike e Kosovës, Vetëvendosjes ia ka borxh 6 deputetë. Se ai është marrë vesh me mua në emër të 18 deputetëve. Tash i ka 12. Por ai s’ka ardhë me folë në emër të 12-ve. Ka ardhë me folë në emër të 18-ve. Unë kam shku me folë në emër të 53-ve dhe 53 janë. Kam shku me folë në emër të 62-ve dhe 62 janë. Ai ka ardhë me folë në emër të 18-ve dhe veç 12 janë”, tha ai.
Kurti tha se do të flasë sërish me Abdixhikun.
“Unë do të komunikojë prapë me të. Me të s’kam nevojë për ndërmjetësues dhe shpresoj që nuk më duhet ta kem nevojën për këtë gjë”, tha ai.
