Deputetja e PDK-së, Ariana Musliu-Shoshi, ka deklaruar se partia e saj nuk është mashtruar ose tradhtuar, por ka vepruar mbi bazën e parimeve, duke kërkuar që përgjegjësia për vendimet politike të mos u faturohet individëve.
Në një reagim në Facebook, Musliu-Shoshi ka thënë se PDK-ja i ka dhënë Kosovës institucione dhe ka treguar përkushtim për mbrojtjen e sakrificës dhe luftës çlirimtare.
“Prandaj, mos i ktheni shigjetat kah Bedri Hamza e kah PDK-ja!”, shkroi ajo.
Sipas saj, nuk mund të kërkohet dorëheqje individuale për vendime që nuk janë marrë individualisht.
“Përgjegjësia duhet të jetë aty ku janë marrë vendimet”, theksoi Musliu-Shoshi.
Ajo shtoi se PDK-ja qëndron me përgjegjësi institucionale dhe ndaj vendit, duke e cilësuar Kosovën si atdhe dhe amanet që nuk duhet tradhtuar. /Zëri
Statusi i plotë:
PDK nuk u mashtrua e as nuk u tradhtua, sepse nuk ka qenë pjesë e lojërave politike, por pjesë e parimeve!
Edhe kësaj radhe PDK i ka dhënë Kosovës institucione, përgjegjësi shtetërore dhe, mbi të gjitha, përkushtim për mbrojtjen e sakrificës dhe të luftës sonë çlirimtare.
Prandaj, mos i ktheni shigjetat kah Bedri Hamza e kah PDK-ja!
Nuk mund të kërkohet dorëheqje individuale për vendime që nuk janë marrë individualisht. Përgjegjësia duhet të jetë aty ku janë marrë vendimet.
Ne, si gjithmonë, qëndrojmë me përgjegjësi institucionale, por mbi të gjitha me përgjegjësi ndaj këtij vendi. Ndaj kësaj toke ku kemi rrënjët, ku prehen stërgjyshërit tanë dhe ku po rriten fëmijët tanë.
Sepse për ne, Kosova nuk është lojë politike. Është atdheu ynë, përgjegjësia jonë dhe amaneti që nuk e tradhtojmë!
