Qeveria e Republikës së Kosovës ka reaguar pas pamjeve virale të Milan Radoiçiqit, duke ecur lirshëm në një tubim të partisë së Vuçiqit, në Rashkë.
Në pamjet që qarkulluan sot në rrjete sociale, Radoiçiq, që është i kërkuar ndërkombëtarisht nga Interpol-i, u pa në tubimin parazgjedhor të Partisë Përparimtare Serbe (SNS), së bashku me Danilo Vuçiqin.
Në një deklarim për IndeksOnline, zëdhënësi i Qeverisë, Arlind Manxhuka, ka deklaruar se kjo është një tjetër dëshmi që sulmi terrorist në Banjskë është planifikuar, financuar dhe organizuar nga shteti serb.
“Kjo është edhe një dëshmi tjetër e qartë që dëshmon se sulmi terrorist në Banjskë të Zveçanit është planifikuar, financuar dhe organizuar nga shteti i Serbisë. Pamjet ku kryekrimineli Radojçiq shihet pranë djalit të ish-presidentit të Serbisë, Aleksandar Vuçiq, në fushatën elektorale atje, do të duhej të ishin alarm për komunitetin ndërkombëtar” ka thënë Manxhuka.
Sipas tij, Serbia jo vetëm që nuk e dorëzon Radoiçiqin tek autoritetet kosovare, po edhe e lejon ta shoqërojë dhe sigurojë djalin e ish-presidentit Vuçiq.
“Milan Radoiçiq jo që nuk dorëzohet tek autoritetet tona nga shteti i Serbisë për të dhënë përgjegjësi para drejtësisë sonë, lëre që nuk ndiqet as nga shteti atje, por madje e shoqëron dhe e siguron djalin e ish-presidentit atje” shtoi zëdhënësi i Qeverisë.
Kujtojmë se Organizata Ndërkombëtare e Policisë, Interpol, lëshoi në dhjetor të vitit 2023 urdhër-arrest për Milan Radoiçiqin dhe 11 persona të tjerë, për shkak të sulmit terrorist të 24 shtatorit në Banjskë, në veri të Kosovës.
BE-ja dhe NATO në vazhdimësi i kanë bërë thirrje Serbisë që ta mbajnë përgjegjës Radoiçiqin dhe të tjerët e grupit që udhëhoqi ai për sulmin e Banjskës./IndeksOnline/
