Kryeministri Albin Kurti ka falënderuar sot deputetët e Kuvendit të Kosovës për miratimin përfundimtar të Ligjit për Parandalimin e Pastrimit të Parave dhe Luftimit të Terrorizmit.
Sipas Kurtit, miratimi i këtij Ligji i mundëson Kosovës të integrohet në sistemin evropian të pagesave SEPA.
“Dua të shpreh falenderimin tim për deputetët që dje votuan në lexim të dytë ndryshim/plotësimin e Ligjit për Parandalimin e Pastrimit të Parave dhe Luftimit të Terrorizmit. Miratimi i këtij ligji i mundëson Kosovës të plotësojë edhe kushtin e fundit për t’u integruar në sistemin evropian të pagesave SEPA (Single Euro Payments Area)”, tha Kurti në një postim në rrjetin social Facebook.
Shefi i qeverisë tha se integrimi në SEPA i kursen mërgatës kosovare rreth 58 milionë euro në vit.
“Ky integrim mundëson transferta bankare të parave me kosto shumë më të ulët dhe do t’u kursejë qytetarëve, bizneseve e mërgatës tonë rreth 58 milionë euro në vit nga tarifat e reja”, deklaroi ai.
