Gazeta Online Veriu.info kishte raportuar në korrik të këtij viti për arrestimin e një grupi personash të cilët dyshoheshin për një skemë kriminale, ku kompani importuese nga Shqipëria dyshohet se kanë importuar ujë në vend të derivateve të naftës, duke përdorur kompani fiktive dhe kompani aktive në Kosovë për të realizuar skemën dhe për të fshehur gjurmët e transaksioneve.
Goditje të fortë kishte marrë edhe Dashnim Miftari dhe kompania e tij “Veda Petrol 2”.
Sipas urdhrit të përkohshëm të ndalimit të lëshuar nga Prokuroria Speciale (Departamenti për Hetimin e Krimit të Organizuar), bëhet e ditur se gjatë zbatimit të urdhërkontrollit, Miftarit dhe biznesit të tij në Hajvali u janë sekuestruar pasuri të lueshme dhe një sasi e jashtëzakonshme e dokumentacionit financiar.
Prokuroria Speciale e Republikës së Kosovës (PSRK) sot ka ngritur aktakuzë ndaj tij dhe të akuzuarve Faruk Mazrek, Fariz Mazrek, Korab Visoka, Fatmir Visoka, Nisret Bajraktari, Skender Kelmendi, Adem Morina, Muhamet Mazrek, Naser Morina, Gazmen Quni dhe Sasivar Mazerek, lidhur me dallavere me transportimin e naftës nga Durrësi për Kosovë.
Sipas aktakuzës thuhet se ai në bashkëpunim me Faruk dhe Fariz Mazrek, pas takimeve të njëpasnjëshme dhe me qëllim të sigurimit të shitjeve dhe blerjeve të naftës, me datat përkatëse përfshirë datën 2 maj 2025, në Doganën e Kosovës ka deklaruar import të derivateve të naftës për bizneset “Veda-2-Petrol SH.P.K” dhe “Veda Group” SH.P.K, e derivati i deklaruar nga mjeti transportues/mauna ALR713 që është shkarkuar në fshatin Mamushë, te biznesi “PO Petrol”, ka rezultuar me ndërhyrje postfabrikore.
Gjithnjë sipas aktakuzës, mjeti transportues dhe mauna në pronësi të “Sefa SH.P.K., që e drejtonte shtetasi shqiptar Valmir Bujari, ka deklaruar në Doganën e Kosovës më 25 tetor 2025 derivate të naftës që ka shkarkuar derivate në fshatin Begracë/Kaçanik, te biznesi “Veda Petrol”, e rrugës në kthim në orët e mbrëmjes, ka ndaluar në autostradën “Ibrahim Rugova”, në anën perëndimore të pushimores.
Më tej, thuhet se puseta te pushimorja e cila shërben për grumbullimin e ujërave nga reshjet atmosferike, ka shkarkuar ujë për disa minuta, ndërsa mostra e marrë në vendin e ngjarjes, rezultoi përmbajtje të ujit.
Po ashtu, thuhet se më 23 tetor 2025, mjeti transportues dhe autobota që e drejtonte shtetasi shqiptar Prekë Gjeka, e ka deklaruar në Doganën e Kosovës derivate të naftës dhe pas shkarkimit të derivateve të naftës për “Veda Petrol”, në orët e mbrëmjes ka shkarkuar ujin në lokacionin – në rrugën magjistrale Prishtinë – Pejë, në fshatin Komoran, në një parking afër një Qendre Tregtare.
Tutje, mostra e ekzaminuar u konstatua përmbajtje ujë, ndërsa në periudhën kohore janar 2021- dhjetor 2025 me deklarimet jo të plota për fakte relevante tatimore, thuhet se ka fshehur qarkullimin real në deklaratat tatimore përgjatë viteve 2021-2025, duke deklaruar furnizime që ATK nuk i ka pranuar si reale në vlerë prej 4,836,142.45 euro.
Andaj, buxhetit të shtetit i është bërë dëm në vlerën prej 1 milion e 376 mijë e 59 euro.
