Kylie Jenner thuhet se ka përfituar rreth pesë milionë dollarë për paraqitjen e saj të shkurtër në sfilatën e modës së Victoria’s Secret, duke tejkaluar, sipas raportimeve, honorarët e disa supermodeleve të njohura, shkruan StyleCaster.
Sipërmarrësja dhe ylli i reality show-t u shfaq për herë të parë në pistën e markës gjatë sfilatës së mbajtur në Los Angeles, më 18 tetor. Paraqitja e saj tërhoqi vëmendje të veçantë, pasi ajo veshi të ashtuquajturën “Fantasy Bra”, një sytjenë luksoze me vlerë të vlerësuar prej 50 milionë dollarësh.
Sipas raportimeve, honorari i pretenduar i Jennerit do të ishte më i lartë se ai i disa emrave të njohur të modelingut, përfshirë Gigi dhe Bella Hadid, si dhe Gisele Bündchen, të cilat u shfaqën në formë videosh gjatë sfilatës së këtij viti.
“Fantasy Bra” u krijua në bashkëpunim me shtëpinë e bizhuterive Jacob & Co. dhe është zbukuruar me 4,410 diamante natyrale, përfshirë një diamant të verdhë prej 75.54 karatësh. Për prodhimin e saj u deshën më shumë se 1,000 orë punë nga 15 persona.
Megjithatë, zgjedhja e Jennerit për të veshur këtë krijim ka nxitur edhe kritika. Adrianne Curry, fituesja e sezonit të parë të “America’s Next Top Model”, vuri në pikëpyetje vendimin e markës, duke argumentuar se kjo veshje tradicionalisht u është besuar modeleve më të spikatura të Victoria’s Secret.
Curry kritikoi gjithashtu prirjen e markës për t’u mbështetur gjithnjë e më shumë te personazhet e famshëm dhe ndikimi i tyre në rrjetet sociale.
Deri në konfirmimin e shumës nga burime zyrtare, pretendimi se Jenner ka marrë pesë milionë dollarë për këtë paraqitje mbetet i pakonfirmuar.
