Pas gati tre vjetësh, CSKA Sofje është rikthyer në adresën e saj historike. Stadiumi i Ushtrisë Bullgare u hap zyrtarisht përpara ndeshjes me Slavia Sofje, e luajtur në kuadër të raundit të 14-të të Kampionatit Bullgar.
Ndeshja përfundoi pa gol, por këtë herë rezultati mbeti në plan të dytë. Në qendër të vëmendjes ishte rikthimi në stadium, i cili mori një pamje krejtësisht të re pas një rindërtimi të gjerë.
Është një nga projektet më të rëndësishme në historinë e kohës së fundit të futbollit bullgar. Rinovimi kushtoi rreth 45 milionë euro dhe ish-stadiumi u zëvendësua nga një ndërtesë moderne me një kapacitet prej rreth 18,500 spektatorësh. Pista atletike u hoq, duke i sjellë tribunat më afër fushës dhe të gjitha janë të mbuluara. Stadiumi përmbush kriteret e kategorisë katër të UEFA-s, që do të thotë se CSKA-ja mund të luajë të gjitha ndeshjet më të rëndësishme evropiane atje.
Projekti u hartua nga firma arkitekturore bullgare IPA – Architecture and more, dhe disenji i tij ka marrë gjithashtu njohje ndërkombëtare. Në çmimet Archello 2025, ai fitoi Çmimin e Publikut në kategorinë Projekte Rekreative të Pandërtuara, ndërsa në çmimet Architizer A+ të njëjtin vit ai mori një përmendje të veçantë në kategorinë Objektet Sportive dhe Rekreative të Pandërtuara. Është e rëndësishme të theksohet se çmimet u dhanë për dizajnin arkitektonik, ndërsa stadiumi ishte ende në ndërtim e sipër në atë kohë.
Stadiumi i vjetër i Ushtrisë Bullgare priti ndeshjen e tij të fundit më 10 dhjetor 2023, kur CSKA u përball me Ludogorets-in. Prishja filloi disa muaj më vonë dhe tifozët duhej të prisnin pothuajse tre vjet për të parë klubin e tyre të luante përsëri në të njëjtën adresë./Indeksonline/
