Deputetja e PDK-së, Sala Jashari, ka kërkuar përgjegjësi nga ministri i Shëndetësisë, Arben Vitia, për rastin e pacientes me kancer të gjirit, e cila, sipas raportimeve të cituara në fjalimin e saj, kishte mbetur rreth katër muaj pa terapinë e nevojshme para se të ndërronte jetë.Në fjalimin e saj gjatë interpelancës lidhur me mungesën e barnave onkologjike, Jashari ka përmendur rastin e pacientes, e cila, sipas organizatës “Renesansa”, kishte mbetur rreth katër muaj pa barin Palbociclib.
Sipas raportimit të përmendur nga deputetja, pacientja kishte mbetur pa këtë bar për shkak të mungesës së tij në Onkologji dhe pamundësisë financiare për ta blerë privatisht. Jashari ka theksuar se kostoja e barit arrinte deri në 1.800 euro.“Katër muaj, zotëri ministër! Për ju mund të jetë një tender që është vonuar. Për atë grua ishin katër muaj pritjeje për një bar, ndërkohë që sëmundja nuk priste”, është shprehur ajo.
Jashari ka sqaruar se përcaktimi i shkakut mjekësor të vdekjes nuk u takon deputetëve, por ka kërkuar që institucionet të japin përgjigje për mungesën e terapisë.“Nuk na takon neve të përcaktojmë shkakun mjekësor të vdekjes. Por na takon të kërkojmë përgjigje: Pse kjo paciente mbeti pa terapinë e përshkruar? Kush ishte në dijeni se bari mungonte? Çfarë zgjidhjeje iu ofrua asaj, kur nuk kishte mundësi ta blinte privatisht?”, ka pyetur Jashari.
Sipas saj, familja e pacientes meriton sqarim, ndërsa pacientët që janë në trajtim duhet të kenë siguri se nuk do të përballen me të njëjtën pritje.Deputetja ka kërkuar që interpelanca të rezultojë me masa konkrete, afate dhe përgjegjësi institucionale për furnizimin me barna.
“Një tender mund të rifillojë. Muajt që një pacient i kalon pa trajtimin e nevojshëm nuk mund t’ia kthejmë”, ka theksuar Jashari.
