Kryeministri Albin Kurti, duke folur në Kuvendin e Kosovës, tha se, sipas bindjes së tij, cilësia e dobët e arsimit dhe problemet në drejtësi janë dy shkaqet kryesore pse qytetarët po largohen nga vendi.
Ai kritikoi gjendjen në komuna, sidomos në zonat rurale. Sipas Kurtit, njerëzit migrojnë brenda vendit, drejt Prishtinës e Fushë Kosovës, ose jashtë, në Gjermani e Zvicër, kryesisht për shkak të arsimit. “Në Kosovë jetohet shumë më mirë si qytetar i Republikës sesa si banor i komunës”, deklaroi ai.
Kurti tha se do të preferonte që arsimi të ishte më i centralizuar. Ai kujtoi se arsimi u decentralizua me propozimin e Ahtisaarit, për shkak të komunave me shumicë serbe. Kërkoi gjithashtu që roli i drejtorëve komunalë të arsimit të merret më seriozisht. Sipas tij, rezultatet në arsim vijnë ngadalë, “mbas nja 10-15 vjetëve”.
Sfida e dytë, sipas kryeministrit, është drejtësia. Ai tha se shumë qytetarë dalin nga gjykatat dhe prokuroritë më të pakënaqur sesa kanë hyrë. Shtoi se një padrejtësi apo një proces gjyqësor që zgjatet shumë mund ta bëjë një qytetar të largohet nga vendi me gjithë familjen.
Kurti foli edhe për Brezovicën. Ai tha se investimet atje ishin të pamundura deri para dy-tri vitesh, sepse sipas tij Beogradi e kontrollonte përmes aneksit. Sipas tij, vetëm tani ekzistojnë kushtet e duhura për të investuar atje. Ai tha gjithashtu se investimet e huaja direkte janë dyfishuar, por që problemi mbetet struktura e tyre, pasi pjesa më e madhe shkon ende në patundshmëri.
Kurti tha se është optimist për fushat e tjera. Për arsimin dhe drejtësinë tha se është “optimist i përmbajtur”.












