Presidenti rus, Vladimir Putin do t’i ndëshkojë ashpër ata që nuk do t’i bashkohen ushtrisë, kjo pas një dekreti që nënshkroi të shtunën. Dënimi për shmangien e detyrës ushtarake gjatë mobilizimit u dyfishua nga pesë në dhjetë vjet.
Sipas dekretit, ushtarët që dorëzohen vullnetarisht në ushtrinë armike mund të përballen me dhjetë vjet burg dhe ata që plaçkitin gjatë kohës së luftës mund të dënohen me 15 vjet.
Putin gjithashtu nënshkroi një dekret tjetër që lejon të huajt që shërbejnë në ushtrinë ruse të aplikojnë për shtetësi pa leje qëndrimi.
Ky ligj do të zbatohet për të huajt që kanë lidhur një kontratë me forcat e armatosura ruse për një periudhë të paktën njëvjeçare.
Ndryshe, Zelensky u bëri thirrje forcave të Moskës të dorëzohen, duke thënë: “Do të trajtoheni në mënyrë të civilizuar… askush nuk do t’i dijë rrethanat e dorëzimit tuaj”.
Fjalimi i presidentit të Ukrainës erdhi vetëm disa orë pasi Rusia miratoi një ligj që ashpërson dënimet për dorëzimin vullnetar dhe dezertimin, dhe ndërsa policia e Putinit arrestoi më shumë se 700 protestues kundër mobilizimit në qytete në të gjithë Rusinë, duke përfshirë rreth 300 në Moskë.
