I pari i Podujevës, Shpejtim Bulliqi, i ka bërë një favor vëllaut të shoferit të tij, Agron Fushës.
Atë e ka shpërblyer me një kontratë për “furnizim me letër të bardhë”. Tenderi kap vlerë e 35 mijë e 582 euro e 20 centë.
Komuna e Podujevës e drejtuar nga Lëvizja Vetëvendosje, tenderin ia dha kompanisë N.T.P “Fusha”, vula e të cilit u dha më 29 shtator 2022.
Kjo kompani është në pronësi të Sylejman Fushës, vëllait të shoferit të Bulliqit, Agron Fushës, shkruan Gazeta Insajderi.
Me vendim të Bulliqit, Agron Fusha është emëruar Zyrtar për Logjistikë – shofer i Kryetarit të Komunës së Podujevës.
Ai është emëruar në këtë pozitë më 6 dhjetor 2021, në kohën kur Bulliqi i fitoi zgjedhjet në Llap.
Bulliqi përpos që i fitoi zgjedhjet sikur plot kryetarë të komunave në të kaluarën, ai veproi edhe si shumë nga ta.
Janë publike rastet, kur kryetarë sidomos të PAN-it, i favorizonin shoferët dhe familjarët e tyre.
Prijësi i Podujevës edhe më herët gjatë gushtit të këtij viti e pati ndihmuar shoferin e tij me 2 mijë euro.
Në vendimin që Bulliqi e pati nënshkruar për dhënien e ndihmës financiare shoferit të tij, Agron Fusha, thuhej se 2 mijë euro i janë ndarë atij për shkak të gjendjes shëndetësore dhe pamundësisë për mbulimin e shpenzimeve mjekësore dhe trajtimit të mëtutjeshëm të tij.
