Kryetari i Partisë Socialdemokrate (PSD), Dardan Molliqaj në një intervistë për Ekonomia Online ka kritikuar Qeverinë sa i përket qasje në dialogun me Serbinë.
Ai shtoi se kryeministri Albin Kurti e kishte konsideruar fitore vendosjen e reciprocitetit, por sipas tij, ky ishte një mashtrim që do t’i bëjë dëm të madh vendit sepse jemi duke humbur në këtë proces.
Molliqaj tha se e keqja e gjithë kësaj pune është që opozita e ka mbështetur Qeverinë Kurti.
“Së pari duhet t’ia bëjmë një kritikë fillimisht Qeverisë, por edhe shoqërisë tonë. Festa mbaroi. Kishte një entuziazëm të cilin e kishte injektuar e imponuar Qeveria e Kosovës thua që ne jemi duke fituar, thua ne jemi duke vendosur reciprocitet dhe jemi duke ecur përpara në dialogun Kosovë-Serbi. Ky ishte një mashtrim i cili në njërën anë do t’i bëjë politike Kosovës në anën tjetër shoqëria duhet të jetë më e vetëdijshme. Jemi duke humbur në këtë proces”.
Ai shtoi se Kosova është në një proces të dëmshëm, sepse do të ketë në thelb normalizimin e marrëdhënieve pa na njohur Serbia.
Molliqaj tha se dialogu nuk mund të kushtëzojë liberalizimin e vizave, por edhe BE-ja po e mban të mbyllur vendin në këtë proces, raporton EO.
“Që nga dita e parë e Qeverisë Kurti kur ka mashtruar se do të jetë prioritet numër 7 kemi thënë që është duke thënë të pavërteta e deri te dita kur ka thënë se po e vendosim sovranitetin dhe reciprocitetin me Serbinë. E keqja e kësaj pune është që opozita parlamentare e ka mbështetur Kurtin në këto veprime prej ndalimit kinse të referendumeve e deri te masa e reciprocitetit. Tani jemi në një proces shumë të dëmshëm për Kosovën. Në njërën anë Kosova do të pranojë marrëveshje e cila do të ketë në thelb normalizimin e marrëdhënies Kosovë-Serbi pa na njohur Serbia. Krejt çka është tu u bo është qysh me normalizuar mosnjohjen”.
“Nuk ka diskutim për njohje dhe ka kompromis të ri, i cili nuk është kompromisi i fundit. Këtë çështje e ka sjellë Qeveria Kurti. Në njërën po na mban të mbyllur BE- ja për çështjen e vizave por në anën tjetër duke mos pasur Qeveri që zgjidh problemin politik edhe kjo qeveri po e mban pezull çështjen e liberalizimit të vizave. Dialogu nuk mund të kushtoj liberalizimin e vizave. E vërteta është që ata e kanë kushtëzuar tashmë. Qeveria Kurti me shumë gjasë do të bëjë një kompromis, i cili nuk dërgon në njohje dhe dëmin që do t’ia sjellë Kosovës do të jetë shumë i madh sesa përfitimin. E vetmja karotë për Kosovën ka mbetur liberalizimi i vizave”, tha Molliqaj.
