“Nëse sheh që opozita frigohet të shkojë në zgjedhje të reja, Kurti do të propozojë Vjosa Osmanin. Nëse opozita ka guxim të shkojë në zgjedhje të reja, atëherë Kurti do të propozojë një figurë që do të jetë e vështirë për opozitën të refuzojë”, tha Humolli.
Humolli thekson se interesimi i Kurtit për Osmanin ka motive politike, pasi si presidente ajo nuk do të jetë aktive në politikën partiake.
Sipas tij, situata varet më shumë nga opozita sesa nga Kurti, i cili, siç thotë Humolli, ai i kalkulon saktë veprimet dhe e ka provuar tashmë “opozitën e dobët”.
“Arsyeja që ai ka interes të propozojë Vjosa Osmanin është politike. Duke qenë presidente, Vjosa Osmani nuk do të jetë aktive në politikën partiake. Nëse nuk zgjidhet presidente, ajo do të jetë aktive në jetën politike partiake, dhe gjasat janë të mëdha që do të jetë në opozitë ndaj Kurtit, sepse aty do të ndihet më e fuqishme për shkak të dobësisë politike të opozitës aktuale. Për këtë arsye, besoj se më shumë varet nga opozita sesa nga Kurti, sepse ai i kalkulon saktë gjërat dhe e ka provuar me opozitën e dobët”, tha Humolli.
Ndërsa, analisti politik, Blerim Burjani tha se Kurti e di që gjasat për të siguruar votat e mjaftueshme janë të vogla dhe për këtë nuk përjashtohet mundësia e një propozimi tjetër.
Burjani thekson se Kurti mund të llogarisë në votën e LDK-së, por nëse nuk ka garanci, ai mund të vendosë për një kandidat tjetër.
Analisti shton se Kurti tash nuk ka interesim të përdorë shantazh politik përmes kërcënimit me zgjedhje të reja, siç ndodhi para katër vjetësh.
“Sipas mendimit tim, ai po analizon se si të detyrojë opozitën të votojë një propozim të tij. Me Vjosen, ai e di që gjasat janë të pakta, pra nuk përjashtohet mundësia e ndonjë propozimi nga familja Jashari. Pra, ai nuk i dihet plotësisht, por është i vetëdijshëm se gjasat janë të vogla. Me Vjosen e ka vështirë, por në këtë çështje mund të llogarisë në votën e LDK-së, pra nëse shkon me propozim të Vjosës. Por, nëse LDK nuk jep asnjë garanci, atëherë ai, për shkak të interesit të tij, mund të vendosë për dikë tjetër. Kjo përmbledh skenarin dhe mundësitë. Tash Kurti nuk ka më aq interesim të shkojë në shantazh, si para katër vjetëve, përmes kërcënimit me zgjedhje të reja, sepse opozita nuk ka ku shkon më keq”, tha Burjani për GazetaBlic.
Xhavit Haliti, PDK, ka komentuar deklaratën e kryeministrit në detyrë, Albin Kurti, i cili nuk përjashtoi mundësinë e zgjedhjeve të reja në prill për shkak të çështjes së presidentes, ku theksoi se deklarata e tij ka një mesazh politik.
Sipas Halitit, ky mesazh më shumë i drejtohet presidentes, duke i bërë të qartë se për t’u zgjedhur ajo duhet t’i sigurojë 80 votat e nevojshme në Kuvend.
Ai shtoi se viti aktual do të jetë vit i sfidave dhe presioneve të mëdha, andaj sipas tij, Kosovës i duhet një koalicion i gjerë me mbi dy të tretat e votave dhe një president konsensual, i përkushtuar ndaj angazhimeve në vend.
“Duhet analizuar se kujt i drejtohet ai mesazh: partisë së tij, partive opozitare, njërës në veçanti apo Presidentes, e cila dëshiron ta ruajë pozitën, por në sallën e mbledhjeve të Kuvendit duhet t’i ketë tetëdhjetë deputetë. Më shumë i besoj kësaj të fundit. Pra, ai i thotë Presidentes: siguroji votat nëse dëshiron të zgjidhesh. Por ajo që unë mendoj dhe besoj se edhe Albini dhe të tjerët e kanë parasysh, është se ky vit do të jetë vit i sfidave të mëdha, vit i presioneve dhe vendimeve të përgjegjshme. Prandaj, do të duhej të kishim një koalicion të madh me më shumë se dy të tretat e votave dhe një President konsensual, me qëllim që të jetë i përkushtuar dhe i angazhuar për Kosovën”, tha Haliti për GazetaBlic.
