Mbyllja e ambasadave amerikane në Lindjen e Mesme dhe kalimi me pagesë përmes Ngushticës së Hormuzit, ishin dy nga kërkesat e Iranit pas propozimit të planit prej 15 pikave të Shteteve të Bashkuara të Amerikës për përfundimin e luftës.
Irani gjithashtu këmbëngul në të drejtën për të vendosur taksa mbi anijet që kalojnë nëpër Ngushticën e Hormuzit, duke garantuar se lufta nuk do të fillojë përsëri.
Sipas Wall Street Journal, Irani është zotuar për ndërprerjen e sulmeve izraelite ndaj Hezbollahut në Liban, heqjen e të gjitha sanksioneve dhe mbajtjen e programit të raketave balistike pa asnjë negociatë për kufizimin e tij.
Një zyrtar amerikan i përshkroi këto kërkesa si “qesharake dhe jorealiste”.
Sipas Axios, Irani është shumë mosbesues ndaj negociatave pasi ata janë sulmuar dy herë gjatë bisedimeve me administratën e Donald Trump.
Pak më parë, Kanali 12 i Izraelit publikoi 14 nga 15 kushtet që pala amerikane i dërgoi Iranit nëpërmjet ndërmjetësve pakistanezë. Këto përfshijnë: Irani duhet të çmontojë kapacitetet e tij ekzistuese bërthamore, duhet të angazhohet të mos zhvillojë kurrë armë bërthamore dhe nuk duhet të ketë uraniumi në territorin e tij.
Irani duhet t’ia dorëzojë rezervat e tij të uraniumit të pasuruar Agjencisë Ndërkombëtare të Energjisë Atomike (IAEA). Impiantet bërthamore në Natanz, Isfahan dhe Fordo duhet të çmontohen.
IAEA-së duhet t’i jepet akses i plotë në objektet bërthamore të Iranit. Irani duhet të braktisë “modelin e tij të forcave ndërmjetëse rajonale”. Irani duhet të ndalojë financimin, drejtimin dhe armatosjen e aleatëve/forcave të tij përfaqësuese. Ngushtica e Hormuzit duhet të mbetet e hapur.
Programi raketor i Iranit duhet të jetë i kufizuar si në rreze veprimi ashtu edhe në sasi. Irani duhet ta kufizojë përdorimin e raketave vetëm për vetëmbrojtje.
Në këmbim, Irani do të përfitonte nga: Heqja e sanksioneve të vendosura nga bashkësia ndërkombëtare. Ndihma amerikane për të çuar përpara programin bërthamor civil. Heqja e mekanizmit “snapback”, i cili mundëson rivendosjen automatike të sanksioneve nëse Irani nuk i përmbush detyrimet e tij.
