Skender Bajrami, pronar i Autosallonit “Alberti” në Prishtinë është në mesin e 15 të arrestuarëve në aksionin e djeshëm nga Policia e Kosovës nën dyshimin për feprat penale “Fajdeja”, “Shmangja nga Tatimi” dhe “Detyrimi”.
Auto Salloni “Alberti” me pronar Skender Bajramin, është njëri prej aksionarëve më të mëdhenj në Qendrën Tregtare “Prishtina Mall” me 17 milionë euro investime. Sot, në ora 18:00 do të filloj ceremonia inauguruese e kësaj qendre.
Në ora 18:15 me agjendë është e paraparë të pranishmëve me fjalë përshëndetëse t’iu drejtohet përfaqësuesit e institucioneve.
Meqenëse njëri prej aksionarëve javën e kaluar ishte arrestuar me dyshimin për dhënie të fajdes, Veriu.info ka pyetur drejtuesit kryesor të institucioneve dhe partive politike se a do të marrin pjesë në këtë ceremoni.
Përgjigje të shpejt dhe të prerë kanë dhënë për Veriu.info nga kabineti i kryetarit të Kuvendit të Kosovës, Glauk Konjufca, duke bërë të ditur se ai nuk do të marrë pjesë në këtë ceremoni.
I pyetur se “a do të marrë pjesë Kryetari i Kuvendit të Kosovës, z. Glauk Konjufca në përurimin e Qendrës Tregtare “Prishtina Mall” dhe se a mendoni që ky do të ishte është veprim i qëlluar, pasi që njëri prej aksionarëve kryesor (Skender Bajrami) është arrestuar me 2 mars për fajde”, Ilir Kërçeli, shef i Kabinetit të Kryeparlamentarit Konjuca ka thënë se ai nuk do të marrë pjesë.
“Kryetari Konjufca nuk do të marrë pjesë në hapjen e qendrës tregtare Prishtina Mall, dhe konfirmoj se nuk është në agjendën e Kryetarit pjesëmarrja në këtë event”, ka thënë Ilir Kerçeli në një prononcim për Veriu.info.
E njëjta pyetje i është drejtuar edhe Kryeministrit Albin Kurti, ministes së Ekonomisë, Artane Rizvanolli, ministes Rozeta Hajdari, ministrit Faton Peci, kryetarit të PDK-së, Memli Krasniqi dhe kryetarit të LDK-së, Lumir Abdixhiku, por asnjëri prej tyre akoma nuk ka kthyer përgjigje.
Ndryshe, nga 15 të arrestuarit ishte vetëm Skender Bajrami që u lirua dhe nuk iu caktua masa e paraburgimit. Se si ka mundësi që nga një rrjet i dyshuar dhe arrestuar për dhënie tê fajedeve, vetëm njërit prej tyre t’i caktohet masë e butë, kjo është e çuditshme!
