Ish-emisari special amerikan për dialogun Kosovë-Serbi, Richard Grenell, i ka demantuar deklaratat e ish-deputetit të Lëvizjes Vetëvendosje, Florin Krasniqi cili ditë më parë, në një debat televiziv tha se kryeministri Albin Kurti është në listën e zezë të ShBA-së për fluturime.
Grenell, në një përgjigje për Nacionalen tha se Kurti nuk është në kurrfarë liste të ndalimit të fluturimit në Amerikë.
“Albin Kurti nuk është në kurrfarë liste të ndalimit të fluturimit për Amerikë. Nëse je në atë listë, atëherë nuk ka mundësi të fluturosh fare. Fakti që ai po udhëton, po fluturon, tregon që ai nuk është në këtë listë”, deklaroi ai.
Ditë më parë, financuesi dhe ish-ligjvënësi i LVV-së, Florin Krasniqi, ka thënë se kur kanë udhëtuar bashkë me Albin Kurtin gjatë viteve 2013-14, shefi i qeverisë ka qenë në listën e zezë të fluturimeve në Shtetet e Bashkuara të Amerikës.
Ai tha se nëse nuk është më në këtë listë, atëherë Kurti le të del dhe të tregoj.
“Kur unë kam udhëtuar me Kurtin ka qenë në listën e zezë të fluturimeve në ShBA. Në vitin 2013-14 nuk e di saktësisht, dy herë kemi udhëtuar. Kur kemi udhëtuar ka qenë në “no-fly list”. Pra është një oficer, marshalli fluturues, që vjen ulet afër teje për siguri. Kjo është shumë keq për Kosovën. Albin Kurti është dashur ta zgjedh këtë problem me Amerikën me kohë. Le të tregon nëse e ka zgjedhur. Ka kallëzuar gjithçka. Tash s’kallëzon kurrgjë dhe s’fol kurrgjë”, u shpreh ai në T7.
