Albin Kurti kësaj here, të paktën publikisht, nuk u përfshi fort në zgjedhjet parlamentare në Shqipëri.
Madje, për dallim prej para katër vitesh, nuk dihet nëse Kurti ka shkuar sot në Tiranë për të votuar.
Nuk ka pasur asnjë qëndrim publik nga ana e tij, e duke ditur se sot pati seancë të Kuvendit, mbetet pak e besueshme që Kurti të ketë udhëtuar pas seancës në drejtim të Tiranës.
Megjithatë, kjo mbetet e pakonfirmuar.
Para 4 vitesh, Kurti kishte votuar, madje edhe partia e tij mori pjesë në zgjedhjet në Shqipëri.
Pas votimit, ai kishte thënë se zgjedhjet janë ditë e demokracisë.
“Dita e zgjedhjeve është ditë e demokracisë. I ftoj të gjithë qytetarët e Shqipërisë që sot ta respektojnë atdheun, duke bërë zgjedhjen më të mirë sipas parimeve dhe vlerave që secili i ka. Dita është e bukur, me diell, kështu do të jetë deri në mbrëmje, uroj sa më shumë ditë të bukura dhe mbarësi për Shqipërinë dhe secilin njëri, që ashtu sikurse unë ka pasaportën e Republikës së Shqipërisë”, thoshte Kurti.
