Mediat ndërkombëtare kanë raportuar për rritjen e çmimit të karburanteve në Kosovë, si pasojë e luftës në Iran.
Artikulli i Associated Press, i publikuar edhe nga Washington Post, nis duke iu referuar Kosovës si një nga vendet më të varfëra të Evropës, që tash po përballet me rritje të çmimeve të naftës, pas luftës në Iran, përcjell Reporteri.net.
Për sfidat me të cilat po përballet pas ngritjes së çmimeve të naftës, për AP ka folur Kushtrim Ajvazi, që merret me kultivimin e patateve.
Ajvazi ka bërë thirrje që qeveria të ndihmojë për t’ua lehtësuar barrën.
“Ne po analizojmë dhe llogarisim çdo kosto shtesë, dhe nëse shohim që ky proces i rritjes së kostove vazhdon, do të detyrohemi të rregullojmë çmimet tona”, ka deklaruar Ajvazi.
Aty përmenden edhe masat lehtësuese që kanë marrë vendet tjera në Ballkan, për të lehtësuar efektet për fermerët.
“Rumania, Hungaria dhe Serbia kanë prezantuar çmime të veçanta nafte për fermerët ose kanë ulur taksën shtetërore mbi të ardhurat”, thuhet në artikull.
Kosova nuk ka rafineri të saj dhe furnizohet tërësisht nga importet. Çmimi i naftës dhe benzinës përcaktohet nga importuesit, të cilëve margjina e fitimit u është e kufizuar në 12%.
Rritja e çmimeve ka rënduar gjithashtu qytetarët e zakonshëm. Bardh Mehmeti, një profesionist IT nga kryeqyteti Prishtina, tha se tani paguan 100 euro për një rezervuar të plotë, krahasuar me 80 euro para krizës. Mehmeti tani po “mendon seriozisht” për mënyra për të blerë një makinë elektrike.
Ndikim raportohet të ketë pasur edhe kriza politike që e përcolli pothuajse gjatë gjithë vitit të kaluar, si dhe aktualja me Presidentin.
“Gjendja ekonomike e Kosovës është ndikuar edhe nga një krizë politike e gjatë që la vendin pa një qeveri plotësisht funksionale për pjesën më të madhe të vitit të kaluar. Qeveria aktuale e Kryeministrit Albin Kurti është sërish në ngërç për shkak të dështimit për të zgjedhur një president të ri”, thuhet në artikull.
Është theksuar edhe kërkesa e PDK’së për ulje të përkohshme të taksave për të lehtësuar barrën për qytetarët dhe bizneset.
Për AP ka folur edhe ish-Kryetari i Odës Ekonomike të Kosovës, Safer Gërxhaliu, i cili ka thënë se qeveria duhet të reagojë urgjentisht në rast të një rritjeje të mëtejshme të çmimeve, për të parandaluar dëme më të mëdha në ekonomi.
“Nuk ka sektor që të mos ndikohet nga rritja e çmimeve”, ka deklaruar Gerxhaliu.
