Shefi i Grupit Parlamentar të Aleancës për Ardhmërinë e Kosovës, Besnik Tahiri thotë se AAK do ta mbështes nismën e deputetit Bekim Haxhiu për tërheqjen e mjeteve nga Trusti pensional, prej rreth 30%.
Besnik Tahiri, në një bisedë për Gazetën Online Reporteri.net tha se partia e Ramush Haradinajt do ta mbështes këtë nismë për siç tha ai zbutjen e gjendjes së rëndë të qytetarëve të Kosovës.
“Siç kemi pasë edhe deklarime publike, ne do ta mbështesim iniciativën e deputetit, Bekim Haxhiu për tërheqjen e mjeteve nga Trust-i pensional, në mënyrë që me e zbut gjendjen e rëndë të qytetarëve të Kosovës”, deklaroi Tahiri për Gazetën Online Reporteri.net.
Ndryshe, deputeti nga radhët e PDK-së, Bekim Haxhiu ka propozuar javën që shkoi edhe një tërheqje të mjeteve prej 30% nga Trusti, pasiqë sipas të njëjtit qytetarët e Kosovës janë duke u përballuar me një krizë si rezultat i ngritjes së çmimit të Energjisë elektrike si dhe ngritjes së çmimeve të produkteve bazë.
Ndërkaq, në lidhje me tërheqjen e mjeteve nga Trusti, sot ka folur për Gazetën Online Reporteri.net edhe ish-kryeministri Isa Mustafa. Ai ka thënë se se njerëzit kursejnë për të patur një siguri në të ardhmen, e nëse tërhiqen mjetet nga Trusti, sipas tij, mundet të ketë një tjetër rritje të çmimeve dhe inflacion.
“Prandaj edhe pse e kuptoj nevojën që kanë qytetarët për shkak të rritjes së çmimeve, nuk do të preferoja që të preket Trusti. Edhe një gjë duhet ta kemi parasysh. Nëse tërhiqen mjetet nga Trusti, do të rritet kërkesa në treg por në rrethanat që jemi nuk do të rritet edhe oferta. Kjo do të çojë në rritje të çmimeve dhe në inflacion. Parat e tërhequra do të vlejnë më pak. Qeveria ka hapësirë të veproj me ulje të tatimeve, akcizave, të ndihmojë kategori të caktuara”, ka thënë Mustafa për Gazetën Online Reporteri.net.
Nga ana tjeter, kryetarja e grupit parlamentar të LVV, Mimoza Kusari-Lila është shprehur se grupi parlamentar i VV-së nuk e mbështesin tërheqjes së mjeteve nga Trusti pensional. /Reporteri.net/.
