Mali i Zi dhe Kosova nuk kanë çështje të hapura dhe takimet e shpeshta në nivelin më të lartë kontribuojnë dukshëm në bashkëpunimin e ndërsjellë.
Detyrë e përbashkët është që në periudhën e ardhshme të konkretizohen projekte me interes të përbashkët në fushën e ekonomisë dhe transportit, u konkludua në takimin e kryeministrit të Malit të Zi Dritan Abazovic dhe Presidentes së Kosovës Vjosa Osmani, njofton televizioni public malazez.
Sipas Qeverisë, në takim është vlerësuar edhe nevoja për përmirësimin e infrastrukturës së komunikacionit, ndërsa kryeministri Abazoviq ka theksuar se fokusi i Qeverisë së Malit të Zi në këtë kuptim do të jetë rindërtimi i rrugës Plavë-Deçan dhe ndërtimi i tunelit Rozhajë-Pejë
“Gjithashtu, u shpreh përkushtimi i të dyja palëve për të punuar për një zgjidhje të shpejtë të çështjes së korridorit ajror mes dy vendeve”.
Abazovic theksoi se Mali i Zi ndjek një politikë gjithëpërfshirëse dhe se është sinqerisht i përkushtuar për çdo lloj bashkëpunimi rajonal, gjë që e ka dëshmuar disa herë deri më tani.
“Në këtë drejtim, po bëhen përpjekje të vazhdueshme për të përmirësuar marrëdhëniet ekzistuese me të gjithë fqinjët, për të dhënë shtysë shtesë dhe për të hapur mundësi të reja për përparim demokratik, ekonomik dhe çdo përparim tjetër në rajon”, përfundoi ai.
Takimi u organizua në margjinat e samitit vjetor të Institutit Republikan Ndërkombëtar – Samiti i Demokracisë në Evropën Juglindore (SEE | DEM), i cili mbahet nga 29 deri më 31 maj në Beçiq.
