Kryetari i LDK-së, Lumir Abdixhiku ka reaguar ndaj deklaratës së ministrit të Infrastrukturës dhe një prej figurave kryesore të Vetëvendosjes, Liburn Aliu, pasi ky i fundit e ka cilësuar Kosovën si “projekt të përkohshëm”.
Abdixhiku ka pyetur se çfarë të duhen “kundërshtarët e jashtëm, kur i ke të brendshmit”, duke shtuar se sot Kosova po udhëhiqet nga popullistë mosbesues ndaj shtetit dhe se Kosova ka mbetur në duar të “mohuesve të shtetësisë”.
Kreu i LDK-së thotë se prandaj e kanë bërë të zakonshme ta shkelin Kushtetutën dhe se betimin mbi Republikë e kanë një farsë.Postimi i plotë:
Ç’të duhen kundërshtarët e jashtëm, kur i ke të brendshmit?
Republika e Kosovës, sot udhëhiqet nga popullistë mosbesues të saj. Fati i projektit më të madh shqiptar, ‘Kosova shtet i pavarur e sovran’ është në duar të mohuesve të vet shtetësisë.
Prandaj betimi mbi Republikë është farsë.
Prandaj shkelja e Kushtetutës bëhet zakonshmëri.
Sepse mosbesimi ndaj Kosovës është bindje.
Këta kanë atdhe të dytë.
Ne kemi vetëm Kosovën.
LDK-ja si formacion i vetëm pavarësist, beson në Republikë. Fëmijët tanë meritojnë të besojnë në Republikë! Në shtetin që prindërit e gjyshërit e tyre nuk e kishin por ua kanë lënë me plot sakrificë. Në shtetin që në vend të mbytjes së ëndrrave e dhënies së pasigurisë u jep shpresën se një ditë do të jenë të barabartë mes popujve e shteteve euroatlantik!
Prandaj dhe zgjedhja juaj është fare e lehtë.
Sepse Kosova është e përhershme.
