Kryetari i Lidhjes Demokratike të Kosovës, Lumir Abdixhiku, ka reaguar publikisht pas rezultateve të zgjedhjeve, në të cilat LDK-ja u rendit e treta, duke shënuar rënie të ndjeshme krahasuar me zgjedhjet e mëparshme. Sipas rezultateve, LDK-ja ka marrë 13.23 për qind të votave në zgjedhjet e 28 dhjetorit, ndërsa në zgjedhjet e 9 shkurtit të po të njëjtit vit kishte arritur 18.27 për qind, shkruan Mitropol.
Në një postim të gjatë dhe reflektues, Abdixhiku ka falënderuar 126.102 qytetarët që i besuan LDK-së, duke e cilësuar çdo votë si përgjegjësi dhe obligim për të ardhmen. Ai ka pranuar hapur se rezultati nuk ishte ai që partia priste, duke theksuar se verdikti i qytetarëve është i padiskutueshëm dhe duhet respektuar me përulësi.
“Rezultati zgjedhor nuk ishte ai që pritëm; larg madje. Por është verdikt i qytetarëve të vendit tonë dhe para tij përulemi me respekt të plotë”, ka shkruar Abdixhiku.
Duke iu referuar rënies së mbështetjes elektorale, kreu i LDK-së ka theksuar se partia nuk i shmanget përgjegjësisë dhe se reflektimi është pjesë e identitetit politik të saj. Sipas tij, dallimi i LDK-së qëndron pikërisht në faktin se ballafaqohet me rezultatet dhe merr përgjegjësi institucionale, pa improvizime dhe pa reagime emocionale.
Abdixhiku ka qenë i prerë në mesazhin e tij se çështjet e brendshme të partisë nuk do të trajtohen përmes debateve të çastit apo presioneve publike, por në përputhje me Statutin dhe traditën demokratike të LDK-së. Ai ka paralajmëruar se, pas certifikimit të rezultateve, fillimisht do të mblidhet Kryesia e partisë dhe më pas do të organizohet Kuvendi i LDK-së, aty ku, sipas tij, vendos anëtarësia dhe jo “klithmat e interesave të ngushta”.
“Në Kuvend, në organet legjitime të partisë, nga anëtarësia e partisë, vendoset fati i LDK-së”, ka theksuar ai, duke shtuar se aty do të trajtohen të gjitha çështjet politike, organizative dhe vendimmarrëse, përfshirë përgjegjësitë dhe vizionin për të ardhmen.
Në postimin e tij, Abdixhiku ka adresuar edhe kritikat që, sipas tij, po vijnë nga jashtë partisë, duke i cilësuar ato si goditje me qëllime jo të mira ndaj LDK-së. Ai ka nënvizuar se partia nuk ndërtohet me sulme të jashtme dhe as me gëzim për humbjen e saj, duke theksuar se LDK-ja është më e madhe se çdo individ dhe më e fortë se çdo përpjekje për ta dobësuar.
“Ne do ta bëjmë fatin tonë, me qetësi, me ndershmëri dhe me përgjegjësi”, ka shkruar Abdixhiku, duke e përshkruar LDK-në si një shtëpi politike që nuk braktiset dhe nuk goditet në ditët e saj më të vështira.
Në përmbyllje, kreu i LDK-së ka ritheksuar falënderimin për votuesit dhe mbështetësit, duke e quajtur besimin e tyre detyrimin më të madh politik të partisë. Postimi i Abdixhikut vjen në një moment kyç për LDK-në, e cila pritet të hyjë në një fazë reflektimi të brendshëm pas rënies elektorale dhe përballë nevojës për riorganizim dhe qartësim të drejtimit politik në të ardhmen.
