Biznesmeni nga Prishtina, Arian Idrizaj, i arrestuar të premten për aferën “Brezovica”, është liruar nga mbajtja pasi ka pranuar të bashkëpunojë me Prokurorinë e Shtetit, ka mësuar Paparaci nga burime brenda organeve të drejtësisë.
Idrizaj, njëri nga tetë të arrestuarit nën dyshimin për dhënie ryshfeti për ndërtimet ilegale në Parkun Kombëtar të Sharrit, është liruar sot nga mbajtja derisa për shtatë të dyshuarit e tjerë vlen masa e ndalimit prej 48-orësh.
Gjykata e ka liruar sot përfaqësuesin e kompanisë private “N.Sh. Rezonanca” gjatë periudhës 2014-2018, i kanë thënë Paparacit burime brenda organeve të drejtësisë.
Skender Musa, avokati i të dyshuarit Idrizaj, nuk e ka pohuar e as mohuar këtë informatë. Në një deklarim për Paparacin të premten në mbrëmje, Musa ka thënë se “kërkesa e prokurorit në seancën e sotme ishte “goxha e gjatë”.
Mbrojtja e Idrizajt shton se vendimi final lidhur me lirimin e klientit të tij do të shpallet nesër.
“Seanca dëgjimore është mbajtur. Vendimi merret nesër. Nuk ka dëshmuar kurrgjë. Janë deklaruar veç rreth paraburgimit krejt të akuzuarit. Nuk ka pasur diçka tjetër. Seanca është vonuar, kërkesa e prokurorit ka qenë goxha e gjonë”, tha Musa.
Prokuroria në Ferizaj sot kërkoi paraburgim për tetë të dyshuarit në rastin “Brezovica 3”.
Në mesin e të arrestuarve është edhe Arian Idrizaj, i cili sot doli para Gjykatës në Ferizaj.
Prokuroria kërkoi caktimin e masës së paraburgimit në kohëzgjatje prej 30 ditësh ndaj tetë të arrestuarve.
Sipas dosjes së Prokurorisë, Idrizaj dyshohet se që nga viti 2014 deri në vitin 2018, në Shtërpcë, si person përgjegjës i personit juridik N.SH. “Rezonanca” me seli në Prishtinë, i ka dhënë 100 mijë euro të pandehurit, ish-kryetarit të Shtërpcës, Bratislav Nikoliq.
Ryshfetin ia ka dhënë me qëllim që t’i mundësojë marrjen e lejes së ndërtimit për objektin rehabilitues “Rezonanca” të cilin pastaj e ka shndërruar në objekt hotelier, thuhet në dosjen e Prokurorisë.
Lidhur me këtë rast, organet e rendit dhe drejtësisë kryen bastisje në katër qytete të ndryshme, përkatësisht: Ferizaj, Prishtinë, Skenderaj dhe Lipjan.
Gjatë kontrollit në objektet e kontrolluara janë gjetur dhe konfiskuar: Dokumente të ndryshme, disa fletore me shënime, tri armë, një karikator me 5 fishekë të kalibrit 7.65mm, tre fishekë të kalibrit 6.35mm, 20 fishekë të kalibrit 7.62mm, një kompjuter, një veturë X6, pesë telefona e një orë dore.
