Qeveria e Kosovës refuzon ta përmend emrin e biznesmenit Ridvan Muharremi, njërit prej të arrestuarve për dallavere me rezervat shtetërore. Avokati i tij tha se është angazhuar direkt nga ministrja Rozeta Hajdari, e cila e mori në mbrojtje pas arrestimit. Nuk i ka dhënë askush përgjigje as pyetjes se pse një biznesmen duhej të ishte angazhuar për blerjen e rezervave shtetërore. Në restorantin e këtij biznesmeni, kryeministri Albin Kurti ka zhvilluar disa takime.
Vuçiq e Bërnabiq sot i drejtohen publikut, nuk dihet arsyeja – Gazeta Expr…
Qeveria e Kosovës është e implikuar në dosjen e Prokurorisë Speciale e cila po i heton dallaveret me rezervat shtetërore në Ministrinë e Industrisë, Ndërmarrësisë dhe Tregtisë.
Drejtori i Divizionit për Rezervat Shtetërore të Mallrave në MINT, Hafiz Gara, dhe drejtori i Departamentit për Integrim Europian dhe Koordinim të Politikave në po këtë ministri, Irfan Lipovica, u arrestuan të premtën. Me ta, edhe biznesmeni Ridvan Muharremi, i përfolur për lidhjet e tij të forta me Lëvizjen Vetëvendosje, përfshirë edhe afërsinë me kryeministrin Albin Kurti. Të tre, sipas Prokurorisë i kanë shkaktuar mbi 600 mijë euro dëm buxhetit të shtetit të destinuar për rezerva shtetërore.
Sipas Prokurorisë, të dyshuarit kishin sjellë 52.5 tonë më pak se sasia e kontraktuar e grurit, ndërsa fare nuk kishin sjellë vaj e sheqer. Vlera e dëmit të pretenduar llogaritet të jetë 601 mijë e 940 euro.
Dje u publikua një fotografi në të cilën kryeministri Albin Kurti dhe zëvendësi i tij, Besnik Bislimi shihen në shoqërinë e Ridvan Muharremit. Emrin e tij s’e ka përmendur kryeministri, kur të premtën mbrëma doli me një video-mesazh për të thënë se “Qeveria është e përgjegjshme dhe e drejtë” dhe se ajo ka sjellë “progres ekonomik dhe demokratik të paparë në Kosovën e pasluftës”.
“Piskamat, shpifjet dhe aksionet pompoze të tyre do të dëgjohen gjithnjë e me radhë”, tha Kurti, duke i akuzuar pushtetet e kaluara, të cilave iu referua si “elita e vjetër dhe e korruptuar politike”.
Ani pse Qeveria kujdeset ta ‘fsheh’ emrin e tij, Mahmut Halimi, avokat i afaristit Ridvan Muharremi, thotë se klienti i tij është angazhuar me lutje nga ministrja Rozeta Hajdari.
“E ka angazhuar Ministria, drejtpërdrejt ministrja Hajdari. E ka lutë, e ka njoftë si person afarist që ka një traditë jashtëzakonisht të gjatë dhe ka një rrjet shumë të gjerë të miqve të vet afaristë”, tha Halimi të shtunën.
Ministrja Hajdari të premtën i mori në mbrojtje tre të arrestuarit, ndërsa theksoi se nuk e di se si ndërlidhet me këtë rast biznesmeni Muharremi.
Hajdari për këtë çështje është deklaruar pasditen e së premtes, në një konferencë për media. Ajo ka mbrojtur zyrtarët e arrestuar e për biznesmenin Muharremi ka thënë se nuk e di se si ndërlidhet me këtë rast.
Deklaratat e avokatit të Muharremit deri më tani s’i ka përgënjeshtruar askush nga qeveria. As nuk kanë thënë se pse një biznesmen është angazhuar në këtë mision, që sipas avokatit, e ka kryer “me shpenzime të veta”.
Qeveria i kishte zhvilluar disa takime me delegacione ndërkombëtare në restorantin e Ridvan Muharremit, “Bukë e Zemër”. Ai vend u bë adresë e hetuesve për bastisje të premtën, dhe nga aty biznesmeni Muharremi u nxor me pranga në duar.
Në dosjen e Prokurorisë, dy zyrtarët e MINT-it akuzohen se kanë tejkaluar kompetencat zyrtare duke lejuar anashkalimin e procedurës së hapur të prokurimit publik. Lipovica thuhet se ka anashkaluar anëtarët e tjerë të Komisionit për Negocimin e Kontratave duke ia mundësuar biznesmenit Muharremi ta luajë rolin e ndërmjetësuesit mes ministrisë dhe operatorit ekonomik nga Turqia. Në dosje gjithashtu thuhet se ishte nënshkruar kontrata për blerje të 10 mijë tonëve nga Turqia për 4.834.778 euro dhe më pas ishte nënshkruar një kontratë për furnizim me vaj luledielli dhe sheqer në sasi 200 mijë litra vaj dhe 120 mijë kilogramë sheqer, për 276 mijë euro./GazetaExpress/
